CEBU, Philippines - Nabuslot ang paa sa usa ka 16 anyos nga tinun-an sa high school dihang kalit lang mibuto ang armas nga giduwaan niini atubangan sa iyang mga higala didto sa Purok Atis, barangay Canjulao, dakbayan sa Lapulapu sa miaging gabii.
Ang biktima mao si Junril Bernabe Villoseno nga molupyo sa maong dapit ug tinun-an sa high school sa gobyerno sa maong dakbayan.
Si SPO2 Ernesto Francisco sa homicide section sa kapolisan sa maong dakbayan mibutyag sa Banat News nga ang biktima nagdala og armas de fuego ug giduwaan kini atubangan sa iyang mga higala.
Apan samtang mapagarbuhon kaayo kining mipatuyok-tuyok sa maong armas sa iyang tudlo, nakablitan ang gatilyo ug aksidente kining mibuto ug ang bala didto motaroy sa iyang tuong paa nga nakapabuslot niini.
Dali kining gihatod sa iyang mga ginikanan ngadto sa Lapulapu City District Hospital apan gibalhin usab dayon ngadto sa Vicente Sotto Memorial Medical Center sa dakbayan sa Sugbo.
Dugang pa ni SPO2 Francisco nga wala nila masuta ang kalibre sa armas nga nakaangol sa biktima kay wala na nila kini makita.
Samtang ang mga ginikanan sa biktima hugot nga namalibad nga ilang pusil ang nakaunay sa ilang anak. – WC (BANAT NEWS)