Kapolisan mi-deny nga may gipik-ap nga babaye labot sa Ellah Joy kidnap-slay

CEBU, Philippines - Ang kapolisan mihimakak nga duna silay gi-pickup nga babayeng giingong posibleng adunay kasayuran sa pagdagit ug pagpatay kang Ellah Joy Pique.

Gikataho nga niadtong Miyerkules sa hapon si Felisa Sasan, 26, taga South Poblacion, dakbayan sa Naga kinsa giingong dunay among langyaw ang giingong gi-pickup diha sa usa ka beach resort sa barangay Tinaan, Naga sa mga sakop sa bag-ong task force sa kapolisan kinsa mihupot karon sa imbestigasyon sa pagdagit sa bata.

Si Senior Superintendent Louie Oppus, deputy regional director for operations sa PRO-7 ug pangulo sa bag-ong task force mihimakak nga duna silay gikustodiya kinsa dunay kalambigitan sa pagdagit ug pagpatay sa 6-anyos nga si Pique.

Si Oppus mihangyo ngadto sa mga sakop sa media sa pagsabot kung ugaling dunay mga impormasyon nga ilang mahipos nga dili nila mahimong itug-an.

Apan taliwala sa panghimakak sa kapolisan ang ginikanan ni Sasan nga sila si Nerissa ug Feliciano mikompirmar nga niadtong Miyerkules gikuha sa kapolisan ang ilang anak.

Ilang gibutyag nga ang Criminal Investigation and Detection Group-7 maoy mikuha sa ilang anak.

Ang nahisgutang mga ginikanan nagpauban pa kini kagahapon sa team sa The Freeman ang igsuong pamantalaan sa Banat News kagahapon sa hapon ngadto sa buhatan sa CIDG aron pagsusi.

Apan ang mga opisyal sa CIDG-7 kusganong mihimakak nga sila maoy mikuha kang Sasan. (BANAT NEWS)