3 masuso sa ccmc nangapaso

CEBU, Philippines - Tulo ka masuso ang nakaangkon og grabeng mga paso sa ilang kalawasan human mibuto ang goose neck lamp nga gisuga kanila diha sa sulod sa Cebu City Medical Center niadtong Domingo.

Ang maong mga masuso nga nagpangidaron pa og tunga sa buwan nga adunay mga sakit nga impeksyon nga sepsis neonatorum gisulod diha sa sick neonate unit sa nahisgutang tambalanan.

 Ang pagkapaso sa tulo nahitabo sa alas-3 sa kaadlawon niadtong Domingo human kalit lang mibuto ang suga sa gihigdaan sa maong mga biktima ug misubay ang kainit ngadto sa hose nga padulong sa mga biktima.

Ang usa sa mga masuso nga batang lalaking taga Talamban nakaangkon og third-degree burn o 25% nga pagkapaso sa iyang lawas samtang ang ikaduhang batang lalaki nga taga Buhisan nasamdan sa pagbuto sa bombilya nakaangkon usab og second-degree burn o 13% nga pagkapaso sa iyang lawas.

Samtang ang taga Adlaon nga batang babaye nakaangkon og paso sa bukton gumikan kay layo lang kini sa bombilya.

Ang hepe sa CCMC nga si Eduardo Sedoripa miklaro nga aksidente lang ang nahitabo ug mipadayag aduna nay imbestigasyon nga gihimo aron masuta ang tinuoray nga hinungdan niini.

Sumala pa ni Sedoripa nga una kini nga nahitabo sa CCMC ug tungod sa maong aksidente gipaubos sa inventory ang tanang kabtangan sa tambalanan aron dili na kini mausab.

Samtang ang nadestino sa maintenance department sa CCMC nga si Engr. Edgardo Borinaga mipadayag nga posibleng nasobrahan sa gamit ang nahisgutang bombilya o ba kaha duna kini depekto.

Nagkanayon ang nagdumala sa pediatric ward sa CCMC nga si Dr. Lee James Maratas nga gibuhat nila ang tanan aron matabangan ang kahimtang sa bata.

Personal nga miduaw kagahapon sa mga pasyente si Mayor Michael Rama ug iyang gimando nga ipabalhin sa Chong Hua Hospital ang duha ka nagrabehan ug akuhon sa dakbayan ang gastos.

Ang kaniadto pa nagplanong ibaligya ang CCMC nga si Kongresista Tomas Osmeña subling nakasaway sa maong aksidente sa maong tambalanan nga gihulagway niyang kultura na.

Nagkanayon si Osmeña nga responsibilidad sa CCMC ang pagpaneguro nga maayo ang estado sa ilang mga gamit.

Sumala pa niya nga angayan nang usbon ang estraktura sa maong tambalanan partikular na nga ibalhin sa taas nga bahin ang mga opisina sa opisyales.

“Kinahanglan nga ang mga pasyente anha gyud na sa silong, unya katong mga officials adto dapat sa taas,” nagkanayon ang kongresista.

Gikahisubo usab og maayo sa kongresista ang nadawat niya nga report gikan sa sinaligan niya nga tinubdan nga giareglo na ang mga ginikanan sa bata aron dili kini mopasaka og kaso sa CCMC.

Subling nabanhaw ang isyu nga mas maayo nga ibaligya na lang sa mga pribadong kompanya ang CCMC ug hingusgan ang health care program sa gobyerno. (BANAT NEWS)