Bag-ohay pa nangompra og shabu nadakpan

CEBU, Philippines - Moabot og 46 ka mga paketeng dunay sulod nga shabu ang nasakmit sa kapulisan gikan sa usa ka gipasanginlang notadong drug pusher sa barangay Pooc lungsod sa Sta. Fe sa isla sa Bantayan niadtong Miyerkules sa ala 1:30 sa hapon.

Ang nadakpan nga suspek mao si Eugene Behasa Escarlan, 39, molupyo sa nahisgutang lugar kansang balay gironda sa kapolisan.

Matud pa ni PO2 Erik Illustrisimo sa Sta. Fe Police dihang nahinabi sa Banat News gi-serve nila ang search warrant nga giluwatan ni Bogo City Regional Trial Court Judge Antonio Marigomen batok sa suspek human gidungog na kini sa maong lugar nga maoy mamaligyaay og shabu diha sa maong lungsod.

Atol sa pag-serve sa search warrant sa pinuy-anan sa suspek nasutang bag-ohay pa kining miabot gikan nga nangompra og shabu sa dakbayan sa Sugbo.

Matud ni Illustrisimo atol sa gihimo nilang pagkapkap sa suspek nahikapan niini ang gamay’ng basiyo sa usa ka vapor rub ug dihang ilang gi-ablihan duna kini daghang sulod nga pakete nga dunay sulod nga gituohang shabu nga miabot sa 46 ka buok wala pay labot sa laing walo ka basiyo nga pakete nga gituohang sudlanan pa og shabu.

Apil sa nakuha sa kapulisan gikan sa suspek ang pitaka niini nga dunay sulod nga P900 nga gituohang halin sa gidiling drugas og 5 U.S. dollars. (BANATNEWS)