Kolektor sa lending gitulis

CEBU, Philippines - Gitulis sa duha ka wala mailhing lalaking nagmotorsiklo ang usa ka kolektor sa usa ka lending firm diha sa dalan Salvador Extension sa barangay Labangon niadtong miaging hapon.

Naalarma dayon ang kapulisan sa Theft and Robbery Section (TRS) ug Fuente Police Station ug Mobile Patrol Group (MPG) nga miresulta sa ginukdanay tali sa duha ka tulisan diha sa may V. Rama Avenue hangtud nga miabot ngadto sa barangay Kalunasan apan napakyas gihapon ang kapulisan pagsikop sa duha.

Si Junifer Ceriano, kolektor sa KLS Credit Lending Corporation mitug-an sa kapulisan nga siya ug iyang kauban nga si Jimmy Katipunan nga maoy drayber sa motorsiklo nangolekta sa mga utangan diha sa nahisgutang lugar.

Apan kalit lang miabot ang duha ka tulisan ug ang usa niini mition kaniya og .45 nga kalibre sa armas dayon kuha sa iyang bag nga gisudlan sa P8 mil nga ilang kinolekta.

Ang mga sakop sa Guadalupe Police Station nga miapil sa paggukod mibutyag nga diriyot matumba sa lubakon nga dalan sa Kalunasan ang mga tulisan apan nakaikyas gyud.  - BANAT NEWS