6 Cebuano na-trap sa NZ

CEBU, Philippines - Unom ka Sugbuanon ang gikabalak-ang naipit sa linog sa Christ Church sa nasud sa New Zealand sa niaging adlaw ug kini sukwahi sa nahaunang taho nga walay Pilipino nga naapil sa maong linog.

Ang kadagkoan sa Kapitolyo mibutyag sa mga tigbalita kagahapon nga usa ka Sugbuanon ang mitawag kanila aron pagpangayo og tabang nga maluwas ang iyang pag-umangkon nga naipit pa hangtud sa pagsuwat ning balita.

Giila ang mga biktima nga sila si Rhea Mae Sumalpong nga taga Tuyan, Naga ug Emmabelle Anoba nga taga lungsod sa Minglanilla samtang may lain pang duha ka Sugbuanon ang wala pa mailhi ang pangalan nga kauban sa unom ka mga Pilipino nga biktima sa linog.

Samtang sa report sa TV Patrol Central Visayas, si Beauty Chua, kapikas sa usa sa mga Filipinong naapektahan sa maong linog didto sa New Zealand nga si John Cristopher Chua nga niadtong Martes mi-text kini nga nagdali sila kay ma-late sila sa bus ug misaad nga mo-text og balik kun break sa ilang klase.

Si Chua usa ka nurse nga nagtungha sa maong nasud aron makatrabaho didto isip registered nurse gikabalak-an sa iyang pamilya nga nameligro tungod kay wala na kini komunikasyon kanila.

Ang maong mga kabanay mibutyag nga nabalaka sila tungod sa migawas nga balitang gihunong una sa mga rescuers ang pagpangita sa mga survivors tungod sa peligro sa aftershocks diin ang mga naliki nga mga buildings naghinay-hinay gihapon og kahugno bisan paman wala nay linog.

Sa report sa Dateline Philippines sa ANC, ang Filipino community leader sa maong nasud nga si Dr. Rose Ruiz, nagkanayon adunay siyam ka mga Filipino nurses ang na-trap sa usa ka nahugnong building.

Samtang pabilin pang gisusi sa mga awtoridad ang report nga adunay 12 ka mga Filipino nga posibleng napiit sa Canterbury Television (CTV) base usab sa mga kabanay nga nanawag sa Philippine Consul General sa Wellington nga si Marcos Punsalang.

Ang Primero Ministro sa New Zealand nga si John Key mideklarar na sa national emergency sa ilang nasud tungod sa naugkat na nga 75 ka patay’ng lawas, ug gibanabanang 30 ka tawo nga na-rescue sa milabay’ng gabii. 

Kapin sa 300 ka tawo pa ang missing, ang mga rescuers giingong nagkinahanglang putlan pa og mga tiil o mga bukton ang pipila sa ilang mga naluwas aron sila masalbar.

Matud pa ni Elizabeth Francia, executive secretary ni Gob. Gwendolyn Garcia nga nagsige pa og text ang mga biktima sa ilang tinubdan ug mireklamo na sa inanay nga pagpanakit sa ilang kabukugan samtang diha ilawom sa midat-og nga bahin sa edipisyo.

Giingong ang mga biktima nahimutang sa ikatulong andana sa edipisyo sa King’s Education nga ilang gitrabahoan.

Nunot niini, gipahibalo na ni Garcia ang Department of Foreign Affairs sa pagsusi sa maong taho nga ilang nadawat aron maatiman ang mga biktima.

Ang maong lugar gitay-og sa 6.3 nga linog niadtong milabay’ng adlaw nga Martes mikalas na og   mga tawo.

Matud pa ni Garcia nga ang DFA ang unang motubag sa maong problema una pa siya makahimo sa sunod nga lakang sama sa paghatag og hinabang human masusi ang taho.  - Gregg M. Rubio, Chester Abadilla ug Rey Pasaporte/EIM (BANAT NEWS)