Inahan sa gikulata ni Joavan mag-sorry

CEBU, Philippines - Ang inahan sa pintor sa giingong gikulata ni Joavan Fernandez sinagop ni Mayor Socrates Fernandez mao na lang ang mangayo og pasaylo.

Base sa report kagahapon nga si Erlinda Briones, inahan ni Casimiro miingon nga siya na lang ang mangayo og pasaylo ngadto kang Joavan tungod kay nahadlok siyang hilabtan sila sa sinagop sa mayor.

Matud usab ni Erlinda nga dili na sila mopasaka og kaso batok kang Joavan. Kahinumduman nga si Casimiro mibiya kini sa ilang balay sa milabay’ng adlaw sa kabalaka nga balikon kini ni Joavan ug hangtud sa oras niining pagbalita wala pa kini mouli sa ilang balay.

Si Senior Inspector Errol Francis Deveyra, officer-in-charge sa Talisay City Police Station nga nahinabi sa mga tigbalita kagahapon nagkanayon nga sukad niadtong Martes hangtud kagahapon wala moanha sa ilang buhatan si Casimiro.

Si Deveyra miawhag kang Casimiro nga mopakita na diha sa ilang buhatan aron pormal nga mapasakaan og reklamo si Joavan.