Multicab vs. SUV 11 angol

CEBU, Philippines - Naangol ang 11 ka tawo dihang ang Suzuki multicab nga pasaheroan nga ilang giluwanan kalit nabangga sa usa ka sports utility vehicle sa dalan A.C. Cortes Avenue sa barangay Looc, dakbayan sa Mandaue alas-2 pasado ang takna kagahpon sa hapon.

Si SPO1 Eduardo Flores sa traffic section sa Mandaue City Police Office (MCPO) miingon nga pareho karong giimbestigar ang drayber sa Suzuki multicab nga si Arcenio Esmeralda ug ang drayber sa Toyota SUV nga gikabangga niini nga si Roly Pilapil, 40, taga barangay Basak, dakbayan sa Lapulapu.

Matud pa ni Flores gikan pa sa 1st Mactan Mandaue Bridge ang multicab nga puno sa pasahero ug paghidangat sa maong dapit kalit kining miliko sa walang bahin aron unta magpatubil og gasolina sa maong dapit.

Apan nabanggaan kini sa maong SUV nga paingon sa dakbayan sa Lapulapu hinungdan sa pagkalimbuwad sa multicab.

Sa maong panagbangga grabeng naangol si Pilapil ug ang kauban niini nga si Maria Judyline Pilapil, 39, taga barangay Basak sa dakbayan sa Lapulapu.

Samtang ang siyam ka pasahero sa multicab gidala sa Emergency Rescue Unit Foundation (ERUF) sa Mandaue City District Hospital ug pulos na luwas ang kahimtang. - BANAT NEWS