2 ka tulisan gipangita sa polis

CEBU, Philippines - Gipangita sa kapolisan ang duha ka mga tulisan nga gituohan nga responsable sa duha ka nagsunod-sunod nga pagpanulis og taxi didto sa Horseshoe Drive sa Banawa, barangay Guadalupe sa miaging Lunes ug Martes.

Usa sa mga biktima mao si Amado Cansob, 62, taga barangay Mabolo ug drayber sa Road Runner Taxi nga nagtangag sa plakang GXF-819 ug body number 2296.

Iyang gibutyag sa kapolisan sa Guadalupe Police Station nga gitulis siya sa duha ka wala hiilhing armadong lalaki kinsa mipara ug misakay kaniya kagahapon sa alas 2:00 sa kaadlawon didto sa I.T Park sa barangay Apas siyudad sa Sugbo ug nagpahatud ngadto sa Horseshoe Drive sa Banawa, barangay Guadalupe.

Apan pag-abot nila sa nahisgutang lugar ang usa ka lalaki nga naglingkod sa luyo mition kaniya’g armas de fuego nga wala matinong kalibre ug mideklarar nga tulis.

Gumikan sa iyang kahadlok gitunol nalang niya ang P1,300 nga iyang kinitaan sa tibuok adlaw ug midagan palayo sa lugar dihang ang iyang taxi gisakyan sa duha ka tulisan sa ilang pag-ikyas.

Pagka alas-3:00 sa kaadlawon nakit-an ang iyang taxi nga gibiyaan sa dalan Dapdap sa barangay San Nicolas siyudad sa Sugbo.

Kini maoy ikaduhang sunodsunod nga tulis sa taxi matag kaadlawon ning dakbayan sa maong dapit.

Sa miaging Lunes sa kaadlawon usa usab ka drayber sa taxi nga si Gerard Solaterio, 28, misumbong usab sa kapolisan sa maong barangay nga gitulis usab siya sa iyang duha ka pasaherong gihatod sa mao gihapong lugar. (BANAT NEWS)