Pintor hadlok tiwason ni Joavan

CEBU, Philippines - Ang pintor nga giingong gikulata ni Joavan Fernandez ang sinagop ni Mayor Socrates Fernandez nagtago-tago na karon kay nahadlok nga tiwason ni Joavan.

Kini maoy gibutyag ni PO3 Mikie Espina kinsa maoy gisugo ni Senior Inspector Errol Francis Deveyra, deputy sa Talisay City Police Station (TCPS) sa pagpangita kang Casimiro Briones.

Si Briones nga taga barangay Candulawan dakbayan sa Talisay nagtibi nga misumbong didto sa mga opisyal sa Candulawan sa miaging adlaw tungod kay gikulata kuno siya ni Joavan.

Gipakita niini ang nawingig niyang dagway uban sa mga bun-og sa kalawasan gumikan sa mga kumo ni Joavan nga gipatugpa ngadto kaniya.

Si Briones, gawas nga pintor sa sakyanan, drayber usab sa habal-habal, samtang ang iyang asawa usa ka labandera.

Ang inahan niini maoy mitug-an ngadto sa kapolisan nga milayas si Briones apan nagbilin og suwat nga dili lang pabalak-on ang iyang asawa kay anaa siya sa luwas nga kahimtang.

Ang inahan ni Briones naghilak kagahapon sa pag-adto sa mga polis tungod sa kahadlok kang Joavan.

Nasayran sa kapolisan nga nasuko lang si Joavan kang Briones dihang mibalibad ang naulahi sa hagit kaniya ni Joavan nga makiglumba didto sa South Coastal Road sa miaging adlaw.

Kini samtang nagsakay siya sa sinaw kaayo niyang awto ug ang kang Briones, usa lang ka motorsiklo.

Si Deveyra nga nahinabi sa mga tigbalita kagahapon mibutyag nga wala pa moanha sa ilang buhatan si Briones aron magpa-blotter ug moduso og pormal nga reklamo batok kang Joavan.

Hinuon na-blotter na ang maong hitabo didto sa barangay Candulwan.

Ang OIC sa TCPS mipasalig nga sundon niya ang nasugdan sa ilang kanhi hepe nga si Superintendent Henry Biñas sa pagdumala sa ilang buhatan ug sa pag-atiman sa mga kaso nga ipadangat sa ilang buhatan.

Si Deveyra nagkanayon usab nga sama kang Biñas wala usab siya’y pili-on sa pagpatuman sa balaod bisan pa man og prominente ang nakabuhat og kalapasan diha sa Talisay. (wc)(BANAT NEWS)