'Black Lady' mihasi bata

CEBU, Philippines - Nautingkay ang mga tinun-an sa grade 4 sa Dalaguete Elementary School tungod sa giingong pagpakita sa usa ka “black lady” sa usa ka tinun-an bisan tunga-tunga sa klase.

Ang maong panghitabo nasinati na sa maong tunghaan sulod sa duha ka adlaw sugod niadto pang Lunes hinungdan nga nabalda ang klase sa maong lawak ug ang ilang maestra nga si Zita Hayo mitawag sa ilang prinsipal. Ang prinsipal sa maong tunghaan nga si Cecelia Cartilla, mibutyag sa Banat News nga ang usa sa ilang mga tinun-an nga 10-anyos nga batang babaye maoy sigehan og pakita sa maong ‘dili-ingon nato.’

Kagahapon mikalit og tiyabaw ang bata tunga-tunga sa ilang klase tungod sa kalit nga pagtumaw sa maong ‘itom nga babaye’ nga gihulagway sa bata diha kang Cartilla nga itom og mata ug nagtabisay ang dugo sa kilid nga bahin sa baba niini.

Matud pa ni Cartilla, ang bata mibutyag nga niadto pang adlaw’ng Domingo nagsugod og pakita kaniya ang maong babaye diha sa ilang balay nga kalit lang mibutho sa iyang atubangan nga nakapalisang og maayo sa bata.

Nianang pagka-Lunes mitungha ang maong bata sa klase apan tunga-tunga sa klase kalit kining mitiyabaw ug mihilak ug dihang gipangutana sa maestro mitug-an kini sa iyang nakit-an diha sa ilang lawak-saringan.    Tungod niini ilang gipatawag ang usa ka healing minister nga si Vioh Amamampang ug gihimo ang pray-over alang sa maong tinun-an, matud pa ni Cartilla daw ‘nahuwasan’ ang bata human niini.

Apan pipila lang ka oras ang milabay subling mikisi-kisi ang bata hinungdan ilaha nang gipatawag ang ginikanan niini ug gitambagang ipadala sa simbahan apan sa tambalanan gidala ang bata nga diin nasutang wala kini sakit.

Kagahapong adlawa mitiyabaw na usab ang maong bata tungod gihapon sa maong babaye hinungdan nga giestoryahan nila kini og maayo aron motug-an sa detalye sa iyang nakita.

Ang bata mibutyag kanila nga nianang pagkagabii gipakita siya sa maong black lady pinaagi sa iyang damgo ug kini nakig-estorya kaniya ug nagpa-ila sa pangalan nga Nunita Cabal.

Midugang ang maong tinun-an nga matod pa ni Nunita Cabal nga dugay na siyang mitaliwan ug wala gyud siyay pamilya ug igo lang siya nga mangayo og tabang pinaagi sa pagpamisa sulod sa lima ka Domingo.

Tungod sa nadunggan sa mga magtutudlo si Cartilla dali usab nga mimando sa iyang mga staff nga magpamisa pahinungod sa maong ngalan.

Apan nahibulong si Cartilla nianang pagka-recess kalit na usab nga mitiyabaw ang maong tinun-an tungod kay adunay laing mga “nawong” nga mipakita ug misulsol nga dili angayang pamisahan si Nunita Cabal.

Tungod niini si Cartilla daling mitawag sa ginikanan sa maong tinun-an ug gitambagang ipadala nalang ang maong bata sa Sto. Rosario Parish Church sa dakbayan sa Sugbo.

Samtang gisalikway ni Cartilla ang pagtuo sa mga tawo nga nasudlan og dautang espiritu ang 10-anyos tungod kay base sa iyang nakita nalisang kini og maayo sa kung unsa may nakit-an niini.

Giangkon usab ni Cartilla nga atol sa pagsaysay sa bata nanimbawot ang ilang mga balahibo ug daw adunay lain silang nabatyagan sa palibot, nga nagpasabot sa presensya sa maong ‘dili-ingon nato.’

Sumala pang Cartilla base sa mga grado sa bata utokan kini ug buotan sa klase ug himsog ang panglawas. (EIM)(FREEMAN)