Station 5 sa Mandaue balhinon

CEBU, Philippines - Nahukman sa konseho sa dakbayan sa Mandaue nga ibalhin ngadto duol sa Mactan Mandaue bridge ang Station 5 sa kapolisan sa maong dakbayan.

 Sa ulahing session sa konseho sa dakbayan sa Mandaue gipadayag ni Vice Mayor Glen Bercede nga angayan nga ibalhin ngadto sa dapit nga dali ra matultolan ang maong police station sa katawhan.

Unya nahukman nila nga adto nila kini ibutang sa karaang weigh bridge sa DPWH nga nahimutang sa AC Cortes Avenue duol sa Mactan Mandaue bridge.

 Matud pa ni Bercede nga dili maayong ehemplo nga ang usa ka buhatan sa gobyerno nga maoy mag-una sa pagbutang og edipisyo sa tungatunga sa sapa hinungdan nga ila kini ibalhin.

Kahinumdoman nga si Mandaue City Mayor Jonas Cortes mimando sa pagpatangtang sa mga balay ug edipisyo nga nahimutang daplin sa sapa aron dili kini mabiktima sa kalamidad ilabi na sa baha.

Usa sa nakita ni Mayor Cortes mao ang Station 5 sa MCPO nga nahimutang tunga sa creek sa Brgy. Opao hinungdan sa pagpabalhin niini. (BANAT NEWS)