CEBU, Philippines - “Wala ko mangita og away,” mao kini ang mensahe ni Mayor Michael Rama ngadto sa iyang kritiko nga kauban ra usab niya sa partido nga si Kongresista Tomas Osmeña sa habagatang distrito sa dakbayan sa Sugbo.
Kini gipadayag ni Rama human siya hagita ni Osmeña nga ipasaysay kaniya ang tanang 300 ka problema sa siyudad nga wala masulbad niadtong siya pa si Osmeña maoy mayor ning dakbayan.
Apan si Rama mipadayag nga iya rang kaugalingong obserbasyon kining 300 ka mga suliran nga wala masulbad ni Osmeña, base sa iyang personal nga pagpaniid sa pagdumala sa kanhi mayor sa dakbayan sa Sugbo.
Apan matud pa ni Rama nga wala niya akusahe ang iyang gipulihang mayor, busa nakapangutana siya “What is his problem?, “ sumala pa ni Rama.
Dugang pa sa mayor nga moabot ra ang hustong panahon nga iyang ipresenta sa konseho ang mga problema nga naa sa iyang listahan gumikan kay gianam-anam niya kini karon og sulbad.
Nagkanayon si Rama nga dili siya magpadala sa mga pagsaway ug igo lang niyang buhaton ang iyang trabaho isip mayor.
Kahinumdoman nga si Rama ug si Osmeña daan nang nagkabangi sa milabay’ng tuig dihang gilatigo og panaway ni Osmeña ang pamaagi ni Rama sa pagdumala sa City Hall.
Apan si Rama nga dili bagibi-an og baba ug dili daginotan og estorya nga walay nada, nagkanayon nga iya lang pasagdahan ang kongresista sa habagatang distrito ning dakbayan kay malagmit dili kini busy sa iyang mga gimbuhaton sa kongreso. (BANAT NEWS)