Imbestigasyon ni Biñas way whitewash

CEBU, Philippines - Gipasalig ni Regional Director Ager Ontog sa Regional Police Office (PRO)7 nga walay mahitabong whitewash sa ilang imbestigasyon batok kang Supt. Henry Biñas nga gipasanginlang nanghinol kang Carmel Loise Matus ang reporter sa Cebu Daily News (CDN).

Kini maoy giluwatang reaksyon ni Ontog atol sa pakighinabi kaniya sa mga sakop sa media human mitumaw ang pagduda nga basin unya kun dunay whitewash sa imbestigasyon sanglit sila mismo ang nag-imbestigar sa reklamo ni Matus batok kang Biñas.

Si Biñas girilibohan isip hepe sa kapolisan sa dakbayan sa Talisay sugod niadtong Sabado human ang naulahi mismo misuwat ug mihangyo kang Sr. Supt. Erson Digal niadtong Pebrero 16 nga parelibo siya.

Apan giklaro ni Ontog nga temporaryo lang ang pagrelibo kang Biñas ug iya kining ibalik human sa imbestigasyon.

“Whatever the outcome of the investigation or the deciding factor he will go back in Talisay,” matud pa ni Ontog.

Gipaniguro ni Ontog nga sa ilang imbestigasyon batok kang Biñas makiangayon aron motumaw ang kamatuoran tali sa namasangil ug sa gipasanginlan.

Kagahapon sa buntag si Aileen Mangubat, publisher sa CDN ug si Matus mibisita sa buhatan sa Regional Investigation and Detective Management Division (RIDMD).

Si Mangubat nga nahinabi sa mga tigbalita nagkanayon nga mipirma sila sa complaint sheet ug ang Certificate of non Forum shopping kabahin sa reklamo ni Matus batok kang Biñas.

Si Sr. Supt. Patrocinio Comendador, hepe sa RIDMD mitug-an nga ilang patubagon si Biñas kalabot sa pasangil ni Matus apan mag-agad kini kun ila pang ipatawag si Biñas aron patubagon sa pasangil.

Iyang gitataw nga kun ilang makita nga adunay probable cause ang pasangil ni Matus hayan nga ila dayong i-forward ngadto sa buhatan ni Ontog. (BANAT NEWS)