UV Mandaue family day mabulokon

CEBU, Philippines - Mabulokon ang labing unang Family Day 2011 sa University of the Visayas Mandaue nga gisalmotan sa mga tinun-an ug sa mga opisyal sa parents-teachers association sa maong tulunghaan nga gipahigayon didto sa Norkis Park sa barangay Looc sa dakbayan sa Mandaue kagahapon.

Ang OIC-School administrator sa maong tulunghaan nga si Dr. Noeleen Borbajo maoy nangulo sa programa nga gitambongan usab sa mga tinun-an, mga magtutudlo ug mga kawani sa maong tulunghaan.

Gisugdan ang kalihokan pinaagi sa usa ka Holy Mass atubangan sa national Shrine of Saint Joseph ug gisundan usab sa foot parade nga nanukad sa atubangan sa city hall hangtod ngadto sa Norkis Park sa barangay Looc sa maong dakbayan.

Si Dr. Borbajo maoy mihatag sa pamukas nga pagpamulong isip paghangop sa mga nanambong sa maong kalihokan ug si Dr. Roberto Gallardo nga maoy education supervisor sa mga pribadong tulunghaan sa Department of Education (DepEd) Mandaue City mao usab ang namulong agi og pagdawat sa mga nanambong sa maong kalihokan.

Sa maong programa may indigay usab sa presentasyon sa mga tinun-an nga naglakip sa high school dance troupe, nga gipahauman usab sa mga awit ni Michael Jackson.

Lakip sa gipatugtog mao ang One Cebu ug Pasigarbo Festival sa lalawigan sa Sugbo nga naghulagway sa kalamboan sa maong tulunghaan nga natukod 59 na ka tuig ang nakalabay. Ang maong eskuylahan maisip nga kabahin na sa kalamboan sa Mandaue ug sa lalawigan sa Sugbo. (BANAT NEWS)