International law competition himoon sa CICC

CEBU, Philippines - Usa ka prestihiyusong sangka kabahin sa international law ang ipahigayon nganhi sa Sugbo.

Ang 2011 Philip C. Jessup International Law Moot Court Competition Philippine National Qualifying Rounds ipahigayon ugma sa Cebu International Convention Center (CICC) sa dakbayan sa Mandaue.

Ang Philippine Association of Law Schools (PALS) maoy mo-host sa nahisgutang kalihukan.

Ang PALS usa ka organisasyon sa law deans gikan sa 80 ka mga law schools sa tibuok Pilipinas.

Ang national administrator sa Jessup Competition niining tuiga mao si Manlalaban Perry L. Pe, dean sa Palawan State University Law School.

Ang Philip C. Jessup International Law Moot Court Competition milanat na sa 52 ka tuig ug mao kini ang labing dakung moot court competition nga salmotan sa 500 ka mga law schools gikan sa 80 ka mga nasud kapin.

Ang dinungang sangka magtuki bahin sa fictional dispute sa mga kanasuran sa wala pa ang International Court of Justice, judicial organ sa United Nations.

Aron maila kun kinsa ang mahimong representante sa Pilipinas karong tuiga ngadto sa competition sa Washington D. C. sa Amerika, ang team nga naggikan sa nagkalain-laing eskuylahan sa balaod, magsangka sa Philippine National Qualifying Rounds.

Si Manlalaban Christina Garcia-Frasco, kinsa miyembro ug oralist kaniadto sa Philippine Team sa tuig 2005 Jessup Competition sa Washington D.C. mibutyag nga ang mga team karon gilangkuban sa Ateneo School of Law, University of the Philippines College of Law, De La Salle University-Far Eastern University Consortium Law School ug Arellano University School of Law.

Si Frasco mao usab ang principal contact sa 2011 Jessup Competition Philippine Qualifying Rounds.

Ang preliminary rounds sa sangka ugma sugdan sa alas 10:00 sa buntag hangtud sa alas 4:00 sa hapon.

Inigka-alas 6:00 sa gabii, ang championship round maoy masaksihan didto sa Plenary Hall sa CICC. (BANAT NEWS)