'Bagsik' sa Labangon gibirahan sa polis patay

CEBU, Philippines - Patay ang usa ka giingong ‘bagsik’ diha sa barangay Labangon ning dakbayan human gikatahong nakigpinusilay sa mga mirespondeng polis nga misitar kaniya kagahapon sa kaadlawon diha sa dalan Tres de Abril ning dakbayan.

Ang namatay tungod sa mga samad pinusilan mao si Marlon Entera, estambay ug residente sa sitio Bunbunan, sa barangay Labangon napatay nila ni Police Officer 2 Leo Gallego ug PO1 Bradford Lavandero nga nadestino sa Mobile Patrol Group.

Usa ka impormante nga si Edgard Whoolbright, 65, kinsa drayber sa traysikad nga gisakyan ni Entera mibutyag sa mga imbestigador sa Homicide Section nga nagpahatud kaniya sa maong lugar ang napatay.

Apan pag-abot sa maong dapit naabot sila si Gallego ug Lavandero kinsa daling misitar kang Entera nga niadtong tungora gikatahong nagbitbit og armas apan imbes nga mopatuo giingong kalit kining milayat sa traysikad ug gipamusil ang mga polis.

Tungod niini gipusil sa mga polis si Entera ug nalup-og, ang duha ka polis mi-turnover sa usa ka kalibre .38 nga paltik rebolber nga may sulod nga duha ka buhing bala ug tulo ka basiyo niini.

Ang mga gitawgang sakop sa Emergency Rescue Unit Foundation mideklarar kaniyang patay na ug wala na dad-a pa sa tambalanan.

Gitahan usab nila ni Gallego ug Lavandero ang ilang mga armas nga gigamit sa maong operasyon nga duha ka M16 A1 rifles, duha ka magazines, usa ka empty, ug 29 ka buhing bala ug lima ka basiyo sa bala niini.

Si PO2 Jodan Batucan sa Homicide Section mibutyag nga sayo nianang orasa gireklamo og pagpamusil si Entera diha sa sitio Cekaleco sa mga grupo sa mga batan-on ug kini natala sa blotter sa barangay.

Ang maong alarma gi-flash diha sa MPG hinungdan sa pagresponde nila ni Gallego diha sa Tres de Abril base sa gibutyag sa barangay diin padulong ang namusil.

Si Batucan nagkanayon nga base sa ilang nakuhang impormasyon ‘bagsik’ sa ilang lugar si Entera ug mamusil kini kun adunay makabingkil.