Kagamhanan sa Sugbo mihatag sa nag-unang serbisyo

CEBU, Philippines - Malampusong gipahigayon sa milabay’ng adlaw ang programa sa kagamhanan sa Dakbayan sa Sugbo nga ang paghatag nila sa mga nag-unang serbisyo ngadto sa katawhan nga gitawag og City Hall At Your Door Step.

Kini gihimo sa Riva Redge Complex sa barangay Tisa diin moabot ngadto sa 11 ka mga departamento sa Cebu City Hall ang mikooperar sa maong programa.

 Ang City Health Department nitanyag og libreng water sampling, mapping alang sa mga street vendors ug miinstolar usab sila og mobile medical ug dental clinic .

Nanghatag usab og mga liso ang City Agriculture Office, samtang ang libreng ligation alang sa mga iring ug iro ang gidalit sa Department of Veterinary Medicine and Fisheries.

Nagpadala usab sa ilang mga personnel ang Cebu City Medical Center diin mihimo sila og nagkadaiyang laboratory services sama sa blood typing, blood sugar count, hematocrit determination, ug Hepatitis B test .

Ang City Civil Registrar’s Office miatiman usab sa mga late registration sa birth, marriage, ug death certificate .

Samtang ang Department of Social Welfare and Services nga gipangulohan ni Catherine Yso nihimo og feeding program ug mihatag og lecture ngadto sa mga inahan.

Gihimo usab kagahapon ang pasiunang pagpangrehistro sa umaabot nilang himoon nga job fair.

Mipahigayon usab og inspeksiyon sa kahimtang sa basura ang   Department of Public Services ug gilimpiyohan usab nila ang mga nabarang kanal. Usa usab ka seminar batok sa drugas ang gidumala kagahapon sa Cebu City Office for Substance Abuse Prevention (COSAP).

Gitudloan usab sa City Traffic Operations and Management ang mga drayber sa habal-habal ug traysikad alang sa mga hustong balaod sa trapiko.

Samtang ang Division for the Welfare of the Urban Poor (DWUP) mihatag og mga legal nga tambag alang sa mga tawo   nga mangunsulta sa ilang estado sa gitukoran nila nga istraktura. (BANAT NEWS)