CEBU, Philippines - Mikapin sa usa ka libo ka mga bata ang nakapahimulos sa libreng pagkaon atol sa gilusad nga “feeding program” sa Villar Foundation Inc.(VFI) sa duha ka barangay ning dakbayan kagahapon.
Si Conrado L. Espinosa ang corporate social responsibility officer sa VFI mibutyag sa Banat News nga ang unang giduaw nila kagahapon sa buntag mao ang barangay Tejero ug sa pagkahapon mao ang barangay Tinago.
Gitawag ang maong programa nga “Kalusugan Caravan Feeding Program” halad ngadto sa kabataan sa tibuok nasud gikan sa VFI.
Kagahapon tagkapin sa 500 ka mga bata sa Tejero ug Tinago ang nakapahimulos sa lugaw, juice drink nga may sustansya, mga duwaan, kalendario ug mga DVD tape.
Sa wala pa ang akto sa pagpakaon, ang matag usa ka bata gikan sa nagkalainlaing sitio sa Tejero ug Tinago, gipanagaan daan og mga meal coupon.
Ang maong mga coupon mao usab gikuhaan og putol ug gihagbong ngadto sa tambiolo alang sa raffle draw pagkahuman og pangaon sa mga bata ug ang premyo sa mga nakadaog, mga duwaan.
Miingon si Espinosa nga sa wala moabot ang akto nila nga pagpahigayon sa pagpakaon, nakigtagbo sila sa mga kapitan sa barangay sa Tejero ug Tinago ug gilakbit saysayan bahin sa ilang gimbuhaton.
Unya nakigtagbo usab dayon sila sa matag lider sa matag sitio diin didto ibahinbahin ang kapin 40 ka kilo nga bugas humay ug ang mga lider na ang nagluto og linugaw nga maoy gisilbi ngadto sa kabataan kagahapon.
Nalipay kaayo ang mga opisyal sa duha ka barangay nga napili ang ilang lugar nga maoy gihatdan og libreng pagkaon alang sa kabataan pinaagi sa VFI.
Si Kapitan Jessielou C. Cadungog sa Tejero nagkanayon nga mapasalamaton kaayo siya kang Senador Manuel Villar nga nahinumdoman pa ang iyang barangay nga maoy usa sa gihatdan og pagkaong libre alang sa mga bata.
Si Espinosa sa iyang bahin nagkanayon nga sa miaging Decembre sa miaging tuig, ang mga barangay Suba ug Pasil ning dakbayan mao usab ang ilang gihalaran sa maong feeding program.
Human sa Tejero ug Tinago, ila pang tun-an ang mga lugar nga angayan nilang hatdan na usab og feeding program niining tuiga.
Usa sa kategoriya sa barangay nga ilang pakan-ong libre ang mga kabataan mao kadtong mga dapit nga nagsugwak ang kadaghan sa mga bata.
Matud pa ni Espinosa nga maoy gusto ni Senador Villar nga lukpon ang tanang barangay sa pagdalit og libreng pagkaon sa makausa pa.
Ang feeding program daan nang gipatuman ni senador Villar uban sa iyang kapikas nga si Congresswoman Cynthia Villar sa Las Pinas, Metro Manila, kaniadtong mga unang katuigan sa l980 diin dili pa siya (Manny) kongresista. Ang maong programa ipadayon sa magtiayong Villar nga dumalahon sa ilang mga anak ugma damlag alang sa mga kabataang Pilipino. (BANAT NEWS)