Sr. Citizen nadasmagan namatay

CEBU, Philippines - Patay ang usa ka 77 anyos nga lolo human kini hidasmagi sa nagbaguros nga motorsiklo sa iyang paglabang sa highway didto sa barangay Cabulihan siyudad sa Toledo kagahapon sa buntag.

Ang biktima mao si Luis Bacos Cantiberos, 77, minyo, ug molupyo sa nahisgutang lugar, samtang ang drayber sa Yamaha STX nga dunay plaka nga 6626-FG nga nakadasmag sa biktima mao si Edwin Brigondo Ubanos, 46, minyo, nga taga barangay Magdugo, sa maong dakbayan.

Matud ni SPO4 Gil Lastimosa sa Toledo City Police Station nga ang motorsiklo puwerting kusoga nga nagdagan ug pag-abot sa maong lugar mao usay pagtabok sa biktima sa karsada ug naglisod na pagkontrolar ang suspetsado sa iyang sakyanan hinungdan nga nasabak ang biktima sa lawas ug sa pagkalagpot niini didto motugpa sa sementadong karsada ug gumikan sa pagkapantok sa ulo niini, diha-diha nakabsan kini sa kinabuhi.           

Gihatod ang biktima ngadto sa Toledo City District Hospital nga wala nay panimuot diin didto ideklara nga siya patay na.

Samtang ang drayber sa motorsiklo boluntaryo usab nga mitahan sa iyang kaugalingon ngadto sa kapolisan ug nagtingkagol na karon sa karsel samtang gihikay sa kapulisan ang tukmang sumbong nga ipasaka niini.  (BANAT NEWS)