Prayer rally alang ni Karen ug Berger

CEBU, Philippines - Isip pagpakita og suporta sa manag-uyab kinsa gitumbok nga suspetsado nga midagit ug mipatay sa 6 anyos nga batang babaye sa Minglanilla, ang mga ginikanan, kaliwat ug mga silingan ni Karen Castro Esdrelon nga taga lungsod sa Tuburan mipahigayon og prayer rally ug santos nga misa didto sa kampo sa Cebu Provincial Police office kagahapon sa udto.

Nagdala sila og mga placard ug streamer nga gisuwatan og “Freedom for Erik and Karen, Justice for Ellah Joy”

Matud pa ni Lorna Brigoli ang maninay ni Esdrelon nga dako gayud ang ilang pagtuo nga nasaypan lang ang iyang kinugos kini tungod kay nasuheto gayud siya kang Esdrelon.

Mipasabot si Brigoli nga sukad sa pagkamatngon og kabuot ni Esdrelon nakasaksi na siya og unsang klase sa pagkabata si Karen.

Mihulagway usab si Brigoli nga kun ugaling mao gayud si Esdrelon ang suspetsado, isip single parent gipakuha nalang unta ni Esdrelon ang iyang gisabak ug wala nalang unta kini niya pakatawha.

Mibutyag usab si Brigoli nga si Esdrelon usa ka mahigugma-ong klase sa pagkatawo ug nagdako usab kini nga husto og pahimangno sa mga ginikanan.

Samtang ang inahan ni Esdrelon nga si Josephine mibutyag usab nga dako ang iyang kalipay sa gihimo sa iyang mga silingan ug kaliwat diin boluntaryo gayud nga mianhi sa dakbayan sa Sugbo aron lang mopahigayon og rally.

Matud pa sa inahan ni Esdrelon nga gani ang kaubanang nurse sa iyang anak mihatag usab sa ilang suporta ug gani usa kanila maoy mitanyag sa iyang trak de karga nga gisakyan sa mga raliyista nga Tuburanon.

Kagahapon pasado alas 2:00 sa hapon gipahigayon ang Santos nga misa sulod sa CPPO nga gidumala ni Fr. Bryan Brigoli.

Karong adlawa mobiya na si Ellah Joy sa ilang panimalay ug ihatod na kini sa lubnganan diin ang santos nga misa pagabuhaton sa simbahan sa Pardo. (BANAT NEWS)