Relasyon sa Phl ug Norway di maguba

CEBU, Philippines - Gisalikway ni Gobernador Gwendolyn Garcia ang posibilidad sa pagkaguba sa relasyon tali sa Sugbo ug sa nasud sa Norway sa kaso karon ni Sven Erik Berger.

Usa sa gibasehan ni Garcia mao ang wala’y plano ni Berger ug sa uyab niining Sugbuanon nga si Karen Esdrelon nga mopasaka og kaso batok sa kapolisan nga misikop kanila sa higayon nga makalingkawas na sila sa padayong imbestigasyon sa kasong pagdagit ug pagpatay sa bata nga si Ellah Joy Pique nga gisang-at batok kanila.

Matud pa ni Garcia nga daghang hagit nga giatubang ang Sugbo nga giilang usa sa dapit sa nasud nga kusog ang paglambo sa ekonomiya.

Nunot niini gipasabot ni Garcia nga kinahanglang balanse ang pagpatunhay sa kalinaw ug kahusay ug ang paningkamot sa kagamhanan nga mapalambo ang ekonomiya.

Lakip niini ang pagdani og daghang mga turista ug ang pagpalambo sa relasyon ngadto sa ubang kanasuran.

Matud pa ni Garcia nga mahinungdanon usab kaayo ang pagpakita ngadto sa langyaw’ng kanasuran ang ka seryuso sa kagamhanan sa kampanya batok sa kriminalidad.

Nanghinaot si Garcia nga masabtan sa ubang kanasuran ilabi na sa Norway ang gihimo sa mga awtoridad tumong sa pagpalutaw sa kamatuoran ug hustisya sa matag habig. (BANAT NEWS)