Macho dancer nga way helmet tiklo
CEBU, Philippines - Arestado ang usa ka lalaking nagpailang macho dancer sa usa ka imnanan human hidakpi sa kapolisan nga migukod kaniya didto sa Aznar road sa barangay Pardo, dakbayan sa Sugbo kagahapon sa kaadlawon.
Ang nadakpan mao si Ritchie Canoy, 18, taga Spolarium St., sa barangay Duljo Fatima siyudad sa Sugbo ug ang iyang angkas nga babaye nga nagpangidaron 14 anyos.
Nadakpan si Canoy human kini sitaha sa mga sakop sa barangay intelligence network (BIN) didto sa South Road Properties (SRP) tungod kay wala kini magsul-ob og helmet samtang nagsakay sa iyang motorsiklo uban sa iyang angkas nga dalagita.
Apan matud pa ni Reynaldo Carilla ang BIN nga misita kang Canoy, nga dihang nakamatngon ang naulahi nga checkpoint ang miatang kaniya, mipasirit kini og padagan sa iyang motorsiklo paingon ngadto sa Mambaling, dayon subay sa dalan sa south road ug Pag-abot sa Pardo, midimano kini subay sa Aznar road paingon sa Alta Vista golf course.
Apan wala siya makabantay nga nag-atang na diay didto sa ibabaw ang mga sakop sa Mobile Patrol group (MPG) nga gikontak sa mga BIN ug nagsunod kang Canoy.
Sa dihang girikisa nasakmit sa kapolisan gikan kang Canoy ang pipila ka bala sa .22 kalibre nga revolver , ug ingon man usa ka bundle nga kuwarta nga tag P1000 nga giingong kita niya sa iyang pagka-macho dancer sa usa ka balay kalingawan sa dalan Colon, dakbayan sa Sugbo.
Ang iyang angkas nga dalagita, gipapauli sa kapolisan, samtang si Canoy gitanggong sa karsel sa Pardo Police Station.
Si Canoy gitakdang pasakaan og kasong illegal possession of ammunition ngadto sa piskaliya. (BANAT NEWS)
- Latest
- Trending
