Kapolisan gipanigurong nisubay sila sa proseso

CEBU, Philippines - Mitingog na ang kapolisan kalabot sa mga nanggawas nga alegasyon batok kanila nga wala nila taronga og dala ang tulo ka menor de edad nga saksi kalabot sa kamatayon ni Ellah Joy Pique.

Matud pa sa kapolisan nga hugot silang mituman og misubay sa investigation procedure sa pagkupot sa mga saksi nga menor de edad aron sa pagsulbad sa kaso ni Pique.

Si Cebu Provincial Police Office Women’s and Children Desk, PO3 Shiela Melendrez, nga walay nakatala sa balaod nga nagbutyag nga gikinahanglan ang presensya sa social worker atol sa ipahigayon nga interbyu sa mga minor nga saksi.

Apan giklaro ni Melendrez nga adunay balaod nga nagtala kun unsaon sa pagpahigayon og interbyu sa mga menor de edad.

Midugang usab si Melendrez nga wala na kinahanglana ang presensya sa social workers atol sa ipahigayon nga interbyu sa mga bata kun ang ilang mga ginikanan anaa aron sila magiyahan.

Base sa “Section 4 under the Rule of Examination of the Child Witness (A.M. No. 004-07-SC) that a child chooses a support person, who will accompany him to testify at or attend judicial proceeding or disposition to provide emotional support for him.”

Samtang si PO2 Hazel Tuazon sa Minglanilla Police Women’s Desk mikompirmar usab nga anaa ang ginikanan sa tulo ka saksi atol sa pagpangutana sa mga imbestigador.

Matud pa ni Tuazon nga ang sakop sa Department of Social Welfare and Development (DSWD) gikinahanglan lang kun walay ginikanan nga mogiya ngadto kanila.

Midugang si Tuazon nga ang kaluha gikuyogan sa ilang inahan samtang ang batang babaye giubanan usab sa ilang amahan.

Nasayran nga adunay nanggawas nga mga alegasyon nga ang mga imbestigador nagkuwang sa ilang mga pamaagi kun unsaon pagkupot ang mga bata atol sa ilang pagpangutana.

Gani giingong dili kaayo ‘friendly’ ang ubang imbestigador nga nangutana sa tulo ka bata butang nga nakapaduda sa kamatuoran sa testimonya sa mga bata.

Ang tulo ka saksi mitumbok nilang Karen Esdrelon ug sa hinigugmang langyaw niini nga si Sven Erik Berger nga maoy nagdagit ni Pique niadtong Pebrero 8 human sa klase niini.

Apan si Atty. Salvador Solima ang abogado sa mga akusado sa nanglabay’ng mga report miingon nga matudloan ug masulsulan ang mga bata ug padayong miinsister nga inosente ang iyang mga kliyente ug nasaypan lang. (Lesley Caminade ug Ria Mae Booc sa The Freeman) (BANAT NEWS)