'Writ of Habeas corpus' gibasura sa korte

CEBU, Philippines - Gipa-amendahan sa korte ang gisang-at nga writ of habeas corpus ngadto na sa petition to bail ang unang gisang-at sa kampo sa mga akusado sa pagsignit ug pagpatay sa 6-anyos nga batang si Ellah Joy Pique.

Ang Regional Trial Court Branch 10 Judge Soliver Peras nga maoy gitahasan nga modungog sa petisyon nila ni Karen Esdrelon ug Sven Erik Berger mimandong amendahan nalang kini nga sila mopiyansa sanglit mipirma na og waiver of detention ang duha.

Base sa report sa Balitang Bisdak nasayran nga si Peras giingong mibutyag nga nasayop si Atty. Salvador Solima sa pagsang-at sa maong petisyon.

 Sa laing bahin, si Gob. Gwendolyn Garcia kinsa mipadayag og pagduha-duha sa pagkadakop sa duha gipakitaan kagahapon sa mga sakop sa National Bureau of Investigation (NBI)-7 sa mga hulagway sa mga video footages nga ilang nakuha gikan sa mga lugar nga diin gipangangkon sa mga akusado diin sila nianang mga orasa atol sa pagsignit kang Pique niadtong Pebrero 8 sa hapon.

Usa na niini ang hulagway sa video footage sa security camera sa Waterfront Hotel and Casino Lahug nga diin nagpakitang nianang kapin sa alas-4 sa hapon mi-check in ang duha sa maong hotel ug uban pang video footages sa sulod sa maong hotel sa samang adlaw nga nagpakitang diha ang duha.

Hinuon ang NBI-7 miklarong ilaha lang gi-verify ang alibi sa mga akusado subay usab sa kamandoan ni Garcia sanglit ang piskalya na maoy modesisyon niini.

Ang director sa NBI-7 nga si Atty. Edward Villarta mibutyag nga unya na sila mohimo og lakang depende sa lakang sa piskalya kalabot sa gisang-at nga kaso sa kapolisan.

Nakagawas na kagahapon sa hapon ang manag-uyab gikan sa pagpatambal tungod sa ilang gipamati sa lawas.

Samtang gibalik na sa mga polis ang mga camera ug laptop sa mga akusado nga una nilang gituohang adunay mga ebidensya silang makuha pagpalig-on sa kaso, si Solima daan nang mibutyag nga walay nakuhang ebidensya ang kapolisan. (BANAT NEWS)