2 'bigtime' pushers dakpan

CEBU, Philippines - Duha ka gipasanginlang big time drug pushers ang nasikop sa gihimong buy bust operation sa Philippine Drug Enforcement Agency (PDEA) ug City Intelligence Branch (CIB) sa managlahing lugar sa dakbayan niadtong Huwebes sa hapon ug kagahapon sa buntag.

Atol sa operasyon sa PDEA nasamdan human maigo ang usa sa mga ahente nga si IO3 Mark Maramba dihang nag ‘people power’ ang mga silingan lakip na ang kabanay sa suspek nga si Marcial Inso alyas ‘Lou’, 38, taga sitio Magsaysay St., sa barangay Suba.

Matud pa ni Jessie Tabanao, ang tigpamaba sa PDEA-7 nga gilabay og mga bato ug botelya ug duna pay milabay og dinamita sa mga ahente apan wala mobuto.

Si Inso nakuhaan og duha ka dagkong putos sa gituohang ang sulod shabu human sa kapin usa ka bulang surveillance. Giingong si Inso nalakip sa drug watch list sa PDEA-7 ug nabutang sa level 2.

Matud pang Tabanao siya maoy supplier og shabu sa lalawigan sa Siquijor, Bohol, Hilotongan Island ug lungsod sa Cordova nga makabaligya og sobra sa 200 gramos matag semana.

Atol sa operasyon napalitan sa PDEA si Inso og usa ka dakong putos sa shabu nga balor P8 mil gamit ang budol money apan human mahatag ni Inso ang shabu ngadto sa poseur buyer nakabantay kini sa sakyanan sa PDEA ug mikaratel og dagan.

Ang mga tawo sa maong dapit pagkahibalong adunay mga ahente sa PDEA daling namunit og mga butang dayong labay ngadto sa mga taga PDEA.

Midugang si Tabanao nga si Kapitan Roger Resurrection sa Suba mi-kuwestyon sa ilang operasyon ug misuway pa unta pagbabag sa dihang ila nang dad-on si Inso.

Lakip sa nakuha nga ebidensya ang dugang usa ka dakong putos nga may sulod nga gidudahang shabu gikan kang Inso ug ang iyang cellphone nga matud pang Tabanao may mensahe nga duna pay mi-order kaniya og shabu.

“Bos naay mokuha og 1/8 (gramos nga shabu) pakuhaa ko bos” segun pa sa unod sa text nga anaa sa cellphone ni Inso.

Si Inso gikatakdang pasakaan sa PDEA og kasong paghupot ug pagpamaligya og ginadiling drugas ug gitun-an na usab ang pagpasaka og kaso batok sa mga mibabag nila lakip na opisyales sa barangay.

Sa laing operasyon, nasikop sa CIB si Susan Cansancio nga taga sitio Ponce 2 sa barangay Carreta ning siyudad kagahapon sa alas-10 sa buntag ug nakuhaan og 120 ka gagmay’ng paketeng gituohang shabu.

Matud ni Chief Insp. Romeo Santander, hepe sa CIB nga nakadawat sila og impormasyong si Cansancio maoy namaligya og ilegal nga drugas sa nahisgutang lugar.

Usa sa iyang mga sakop ang mipalit og shabu kang Cansancio nga miresulta sa pagkasikop niini ug sa pagrekisa kaniya nakuhaan kini og 120 ka gagmay’ng pakete nga may sulod nga gidudahang shabu nga mokantidad og P22 mil. (BANAT NEWS)