'Masiao runners' nadakpan kay way mga helmet

CEBU, Philippines - Nadakpan ang duha ka lalaking gipasanginlang runner sa ‘masiao’ tungod sa kalapasan sa lagda sa trapiko dihang nag-angkasay sa motorsiklo nga pulos walay mga helmet kagahapon sa tungang gabii diha sa South Road Property (SRP).

Segun sa report sa City Intelligence Branch (CIB), nga pasado alas 12:20 kagahapon sa tungang gabii, nag-roving ang SRP Mobile Car 002 luwan ang mga sakop sa Barangay Intelligence Network (BIN) nga sila si Reynaldo Corilla ug Ruben Wamelda.

Nasigpatan sa duha ang usa ka motorsiklo nga gisakyan sa duha ka lalaki nga wala magsul-ob og crash helmet hinungdan nga ilaha kining gipara. Giila ang duha nga mao sila si MC Geordust Baynosa, 20, taga barangay Kabatbatan lungsod sa San Fernando ug Edito Obaob, 24, taga sitio Labigan sa barangay Kabatbatan.

Si Baynosa nakuhaan sa iyang posesyon og 36 ka tally sheets nga dunay nagkalain-laing number combinations ug P640 samtang 34 usab ka tally sheets, P600 ang nakuha usab sa posisyon ni Obaob.

Si Obaob nga nahinabi sa Banat News miingon nga bag-ohay pa silang misulod isip runner tungod kay dili paigo iyang kitaon sa pagpamasahero isip habalhabal didto sa ilang lungsod.

Matud niya nga P200 matag hatud niya sa tally sheets diha sa Mango Avenue ang iyang kitaon. Sumala pa niya nga usa ka ginganlan og Mario nga taga diha ra usab sa ilang barangay maoy mosugat sa maong mga tally sheets.

Gibutyag nila ni Obaob ug Baynosa nga ang coordinator sa masiao sa ilang barangay mao si Ursing nga ang anak niini usa ka kagawad sa barangay sa ilang lungsod.

Ang duha gitanggong karun sa karsel sa Cebu City Police Office (CCPO) ug gipaabot nga pasakaan sa kapulisan ug tukmang kaso kagahapon sa hapon. (BANAT NEWS)