Igsuon ni Tongol nadakpan

CEBU, Philippines - Bisan pa sa iyang ka-idlas nadakpan ra gyud sa kapolisan ang igsuon ni anhing Joel ‘Tongol’ Nodalo nga si Isidro “Boteks” Nodalo kinsa nag-atubang og daghang kasong pagpatay ug pagpanulis dinhi sa dakbayan sa Sugbu.

Si Nodalo nasikop sa miaging hapon diha sa baybayon sa Banakon Island sakop sa lungsod sa Getafe, Bohol sa hiniusang grupo sa Criminal Intelligence Branch (CIB) ug Homicide Section pinangulohan ni Chief Insp. Romeo Santander ug kapulisan sa Getafe.

Si Isidro Nodalo Jr. nagpuyo diha sa barangay Ermita ug manghod ni anhing Joel ‘Tongol’ Nodalo kinsa gipasanginlang local contact sa mga banggiitang tulisan gikan sa ubang lugar.

Si Boteks gidakop base sa Warrant of Arrest sa kasong murder nga giisyu ni Judge Estella Alma Sinco sa Regional Trial Court Branch 12.

Si Jul Mohammad Jamiri, deputy sa CIB nga nahinabi sa Banat News mitug-an nga diha na nila madakpi si Nodalo sa pantalan sa Pandanan samtang padulong na mosakay og pumpboat paingon dinhi sa dakbayan alas 4:30 sa miaging hapon.

Matud ni Jamiri nga dugay na silang nakadawat og kopya sa WOA ni Nodalo sa unom ka mga kasong murder nga anaa sa Homicide Section ug ang katapusan niining gipusil patay mao ang usa ka asset sa CCPO niadtong Disyembre sa miaging tuig diha sa Carbon Area.

Duna pay laing WOA si Nodalo diha sa kapulisan sa dakbayan sa Lapulapu ug laing tulo ka WOA nga robbery diha sa Theft and Robbery Section (TRS) sa Cebu City Police Office (CCPO). (BANAT NEWS)