Professional referee misampak sa prime mover kay brownout patay

CEBU, Philippines - Tungod sa brownout, patay ang 50-anyos nga professional referee sa commercial league nga basketball human aksidenteng mibangga ang iyang gimanehong motorsiklo sa nag-parking nga prime mover sa highway sa sitio Pag-utlan barangay Maslog siyudad sa Danao kagahapon sa alas 3:30 sa kaadlawon.

Ang biktima nga gideklarar nga dead on arrival pag-abot sa tambalanan mao si Conrado Colis Bonite Jr., 50, molupyo sa barangay Taboc, Danao ug official referee sa basketball league.

Matud ni PO1 Rommel Costan, traffic investigator sa Danao City Police dihang nahinabi sa Banat News, ang biktima kusog kaayong nagpadagan gikan sa siyudad sa Sugbo paingon sa Danao.

Sumala pang Costan brownout sa maong lugar niadtong higayuna ug ngitngit kaayo ang kadanan maong wala makabantay ang biktima sa nag-parking nga prime mover sa tuong bahin sa karsada.

Gihulagway niya nga maayong pagkapasok ilawom sa luyong bahin sa maong prime mover ang biktima ug nalukot ang motorsiklo niini nga napilit sa luyong bahin.

Gideklarar sa mga doktor nga dead on arrival si Bonite tungod sa grabing kadaut niini sa dughan tungod sa nangabaling bukog ug ang grabeng kadaut sa ulo niini nga naparok.

Ang prime mover gipanag-iya sa Philippine National Oil Corporation-Energy Development Corporation ug gimaneho ni Nestor Prieto Ebcas, 49, kasamtangang gibalhog sa karsel sa kapulisan samtang gihimo pa ang dugang pakisusi kun duna ba kini tulubagon sa nahitabo. (BANAT NEWS)