Clamping sa Citom way pilion
CEBU, Philippines - Gipasalig sa executive director sa City Traffic Operations Management (Citom) nga si Atty. Raffy Yap nga dili mamili ang ilang mga traffic enforcers sa nagkadaiya nila nga operasyon sa kadalanan sa pag-clamp sa mga government vehicles ug pagbadlong sa sakyanan nga magpataka lang og parking.
Gihangyo usab niya ang publiko nga isumbong sa ilang buhatan kung dunay mga sakyanan sa gobiyerno ang nakasupak sa balaod sa trapiko.
Pagka-karon, mohulma og suwat si Yap sa kagamhanan sa siyudad nga maghangyo nga ipasusi ang mga estado sa mga sakyanan sa gobyerno kung angayan pa ba ni nga padaganon.
Gipasabot ni Yap nga dunay ubang government vehicles nga walay suga apan padayong gigamit sa ilang ahensya ug dili kini maayong ehemplo ngadto sa publiko.
Sa laing bahin, gihangyo ni Yap ang publiko nga mokooperar sa ilang buhatan aron masanta ang mga badlungong traffic enforcers ilabi na nga kadtong manago oras tingtrabaho.
“ I-report gyud na sa among office, aron ato silang imbestigahon,” matud pa ni Yap.
Moabot sa kapin sa 500 ang personnel sa CITOM ug 289 niini mga traffic enforcers. (BANAT NEWS)
- Latest
- Trending
