Plastic bags i-ban sa talisay

CEBU, Philippines - Ang mga department store, shopping mall ug ubang mga tindahan sa dakbayan sa Talisay dili na unya tugotang mogamit og mga plastic bags nga sudlan sa gipamalit sa ilang mga kustomer.

Niadtong Martes sa buntag ang konseho sa Talisay mipasar og ordinansa kabahin sa pag-ban og gamit og plastic bag ngadto sa mga tindahan sa siyudad.

Si Konsehal Rodolfo Cabigas kinsa maoy nangamahan sa ordinansa mipasabot nga tumong sa siyudad nga malikayan na ang pagkabara sa mga kanal agi usab sa pag-amping sa kalikupan.

Matud niya nga samang ordinansahon ang gibuhat sa dakbayan sa Mandaue ug kini mahimo usab sa dakbayan sa Talisay.

Ang Konsehal nagkanayon nga sama sa ubang mga tindahan sa dakbayan sa Sugbo isugyot usab niya ang paggamit og mga green bags o kadtong mga bags nga ginama sa bio-degradable materials imbes nga plastic bags.

Base sa gipahigayong inspection sa City Engineering Office nasuta nga kasagaran sa mga nakabara sa drainage system sa dakbayan mga plastic bags.

Gipasabot ni Cabigas nga hinay-hinay ang ilang pag-implementar sa ordinansa sa pag-ban sa mga plastic bags tungod kay maapektohan niini ang mga tag-iya sa mga tindahan ug mga distributors sa mga plastic bags.

Hinuon niadtong Biyernes sa milabay’ng semana nga maoy kataposang public hearing ang mga representante sa tanang mga sektor lakip na niini ang department store miuyon sa ordinansa. (BANAT NEWS)