Professional squatters way mapaabot nga hinabang

CEBU, Philippines - Mga panimalay sa gihulagway nga mga professional squatters duol sa city social development office ug city health sa barangay Centro ug ang buhatan sa Presinto 5 sa Opao dakbayan sa Mandaue nalakip sa ipaguba ni Mayor Jonas Cortes.

Ang pangulo sa Housing on Urban Development Office (HUDO) nga si Emmanuel Arong nga nahinabi sa Banat News miingon nga nahimutang sa sapa sa maong dapit ang presinto ug barangay hall.

Si Cortes nga nahinabi sa Banat News miingon nga ilang gitan-aw ang ubos nga bahin sa 1st Mactan-Mandaue Bridge sa barangay Cambaro nga maoy kabalhinan sa kapolisan sa Presinto 5.

Matud pa ni Cortes adunay 18 ka mga professional squatters sa dakbayan nga ilang demolison apan dili nila mahatagan og relokasyon o bisan unsang tabang.

Matud pa ni Arong nga ang maong mga professional squatters kanhi nagpuyo sa Tipolo Creek nga gipabalhin panahon sa 12th ASEAN Summit sa tuig 2006 ngadto sa Canduman.

Dugang pa niya nga nakadawat na og pinansiyal nga hinabang gikan sa kagamhanan sa dakbayan kaniadto apan gipamaligya nila ang maong mga balay ug namalik diin sila unang gipapahawa. (BANAT NEWS)