CEBU, Philippines - Patay diha dayon ang usa ka lalaki human giatangan ug gipusil human makakita og sinukmagay kagahapon sa alas 10:30 sa buntag diha sa sitio Pungtud sa barangay Mambaling siyudad sa Sugbu.
Ang biktima giila sa kapulisan nga mao si Ernesto Zamora, 40, nagpuyo sa nahisgutang lugar samtang ang gitumbok nga mipusil kaniya mao ang ginganlan og Saddam Batelier, 24.
Sa imbestigasyon sa kapulisan nagbutyag nga usa ka Fernando Domingo, porter sa pantalan mitug-an nga sa wala pa mahitabo ang pagpamusil ang biktima ug ang suspetsado nagsinukmagay.
Ang suspek miuli sa ilang balay kinsa nagpuyo ra sa nahisgutang lugar ug wala magdugay mibalik nga nagdala og wala matinong kalibre sa armas ug gipusil ang biktima makatulo ka higayon.
Si Zamora nahiagom og samad pinusilan sa liog ug tiyan hinungdan nga patay kini diha dayon samtang daling misibat ang gikatahapan.
Ang Crime Scene Investigation Unit (CSIU) ug Homicide Section sa Cebu City Police Office (CCPO) walay nakuhang empty shell gawas lang sa usa ka slug sa wala pa matinong kalibre sa armas.
Ang kapulisan padayong mihimo og imbestigasyon aron masuta kun unsay sinugdanan sa ilang away nga misangko sa sinukmagay ug pagpamusil sa suspek ngadto sa biktima.
Sa laing bahin, talandugon ang kahimtang sa usa ka Josephus Reynes, 24, human gidul-itan pagpusil diha sa nawong kagahapon sa alas-12 sa kaadlawon diha sa barangay Lorega San Miguel siyudad sa Sugbu.
Ang biktima kinsa anaa pa karun sa Intensive Care Unit (ICU) sa Vicente Sotto Memorial Medical Center gikatahong gipusil ni Brian Simpillas, 30. Wala pa maestablisar sa kapolisan kun unsay motibo sa pagpamusil. (BANAT NEWS)