Koreano gilabniha'g bag sa babaye

CEBU, Philippines - Dakong kantidad nga salapi ang nahanaw sa usa ka Koreano dihang gilabni ang iyang bag sa usa ka babaye nga nanghagad og sex kaniya didto sa barangay Basak, dakbayan sa Lapulapu sa miaging kaadlawon.

Ang biktima mao si Kim Jin Ho, 30, ulitawo nga temporaryong nagpuyo sa Brokefield Subdivision sa barangay Basak sa maong dakbayan.

Si SPO2 Frederick Islit sa Theft and Robbery Section sa kapolisan sa maong dakbayan miingon nga sa pakisusi nga ilang gihimo ilang nasayran nga nagmaneho ang maong langyaw sa iyang sakyanan ug mipadaplin kini sa maong lugar kay gibasa niya ang text message sa cell phone nga iyang nadawat.

Apan sa maong higayon usa ka wala hiilhing babaye kalit lang miduol kaniya ug nangutana kini kun gusto ba siyang (Koreano) makig-sex.

Matud pa ni Islit nga ang Koreano kinsa wala pa tugki og gana sa maong higayon namalibad ngadto sa babaye.

Unya mihangyo ang naulahi nga mosakay siya sa sakyanan sa langyaw kay adto manaog sa unahan.

Apan sa pag-abot niini sa ngitngit nga bahin sa maong lugar nanaog   ang babaye uban sa pagbunlot sa bag sa biktima, busa gikuptan sa Koreao ang gawong sa bag apan gumikan sa huygo tudong paglabni, naputol ang gawong sa bag hinungdan nga milampos gyud ang babaye sa pagsakiyo sa bag sa biktima.

Sulod sa maong bag mao ang cash nga P20,000 ug $300, cell phone, ATM ug pass book.

Padayon karong gipanid-an sa kapolisan ang maong babaye. (BANAT NEWS)