4 bata namatay sa dengue

CEBU, Philippines - Upat na ka bata ang namatay sa buwan sa Enero ning tuiga gumikan sa sakit nga dengue sa mga dakbayan sa Sugbo ug Talisay.

Kini samtang mikabat usab sa 128 na ka kaso sa maong sakit ang natala dinhi sa dakbayan sa Sugbo sa nahisgutang buwan ug tulo ka pilo ang gidaghanon sa pagsaka niini kun itandi sa susamang periodo sa miaging tuig

Sa upat ka nakabsan sa kinabuhi, duha niini   taga barangay Talamban ug Tisa sa dakbayan sa Sugbo, samtang taga sitio Tabulasan, barangay San Isidro, sa dakbayan sa Talisay usab ang laing duha.

Si assistant city epidemiologist Durinda Macasocol sa dakbayan sa Sugbo nagkanayon nga   padayon karong   alerto ang mga otoridad sa kasanihan sa dakbayan aron malikayan sa katawhan ang dengue.

Dugang pa niya nga aktibo ang dakbayan sa kampaniya batok sa dengue ug gani nagpadayon gihapon ang programa nga gitawag og Dengue Education Awareness and Reduction (DEAR) aron hingpit nga ma-monitor ang maong sakit nga gikabalak-an pag-ayo sa publiko sukad pa kaniadto.

Si Macasocol miawhag sa publiko nga magmabinantayon ug manglimpiyo kanunay sa ilang palibot aron dili mosaka ang kaso sa dengue.

Aduna usab   sila’y   house-to-house nga kampanya aron gun-ubon ang mga lugar nga maoy kasagarang itlogan sa mga lamok sa dengue.

Mitabang usab sa kampanya ang mga Barangay Health Workers pinaagi sa pag-edukar sa mga tawo bahin sa dengue ug unsaon ang paglikay niini.

Sa laing bahin, si Talisay City Health Officer Lino Alanzado nga nahinabi sa mga tigbalita kagahapon mibutyag nga wala pa siya makadawat sa pormal nga report bahin sa giingong duha ka batang namatay gumikan sa dengue. 

Apan matud ni Alanzado nga padayon gihapon ang ilang kampanya batok sa dengue sa siyudad ug nagkinahanglan usab sila sa kooperasyon sa mga residente. (BANAT NEWS)