Pugante sa city jail nadakpan

CEBU, Philippines - Miiskapo kagahapon sa kaadlawon ang usa ka banggiitang kawatan gikan sa Cebu City Jail apan nadakpan dayon kini sa mga otoridad paglabay sa lima ka oras didto sa South Road Property (SRP) sa habig sa sitio Calapukan sa barangay Mambaling siyudad sa Sugbo.

Ang miiskapo ug nadakpan pagbalik mao si Francisco Libradilla, 19, taga Spolarium St., sa barangay Duljo Fatima ning dakbayan sa Sugbo ug lumad nga taga barangay Guiwanon sa lungsod sa Barili.

Si Supt. Felixberto Jagorin Jr., jail warden sa Cebu City Jail nga nahinabi sa mga tigbalita mitug-an nga nabilanggo si Libradilla niadtong Enero 26 niining tuiga sa kasong robbery human kawata niini ang tulo ka laptop computer nga nagkantidad og P120 mil.

Kagahapon sa alas 4:30 sa kaadlawon giatol ni Libradilla ang pag-eskapo dihang mibundak ang kusog nga uwan.

Matud ni Jagorin nga si Libradilla didto moagi sa kisame sulod sa iyang selda dayong dagan paingon sa pikas building nga bag-ohay lang gi-inagurahan sa may tower 5 ug miambak sa gawas nga may gilawmong 12 ka tiil.

Si Jail Officer-1 Bryan Adam Cadusale nga nakabantay sa pag-eskapo ni Libradilla daling migukod ug gipasalbahan sa iyang service firearm nga M16, apan tulin pa sa manatad si Libradilla ug wala gyud mohunong.

Hangtod nga nahurot nalang ang usa ka magazine nga bala wala gyud mopatuo si Libradilla hangtod nga nawagtang kini.

Busa nanangpit si Cadusale sa taga radio ug dihang gisibya na sa kahanginan daghang mga kasayoran ang ilang nadawat hangtod nga nasuta nila nga mipasok kini sa ilawom sa usa ka sakyanan didto sa SRP habig sa Mambaling diin didto nila siya masikop pag-usab.

Sa pagkakaron gisuta nila kun kinsa tong tawo nga maoy nakatug-an kanila nga misangpot sa pagkasikop ni Libradilla ilawom sa sakyanan aron maoy modawat sa ganting salapi nga P10,000. (BANAT NEWS)