Car racer bagol-bagol nabuak

CEBU, Philippines - Nabuak ang ulo sa 17 anyos nga bayong-bayong samtang kritikal usab ang kahimtang sa classmate niining angkas dihang misaliring sa karsada ang motorsiklo nilang gisakyan atol sa giingong pakiglumbaanay niini sa laing motorsiklo didto sa Sitio Tambisan, barangay Mantalongon lungsod sa Barili niadtong Martes sa hapon.

Ang biktima nga namatay diha-diha mao si Ronillo Villarin Magnitiko Jr., 17, third year high school sa Mantalongon National High School nga taga barangay Guadalupe, lungsod sa Carcar ug maoy nagmaneho sa motorsiklo.

Samtang ang classmate niining angkas nga anaa sa talandugong kahimtang mao si Mark Kevin Polbos Manciera, 18, nga taga barangay Tal-ot, Barili.

Si PO3 Job Sarveda, desk officer sa Barili Police Station mibutyag sa Banat News nga sayo niini nakiglumbaanay ang mga biktima sa laing mga batan-on nga de motor usab kinsa gumikan sa kaisog walay sul-ob-sulob og helmet.

Apan sa kakusog sa ilang pagpadagan sa motor, pag-abot didto sa Tambisan mipabulhot og padagan ang biktima sa ilang sakyanan ug gi-overtekan ang ilang kalumba dihang nawad-an kini og control sa iyang sakyanan ug misaliring kini sa karsada dayong kalagpot nila sa motor ug mitugpa sa sementadong karsada. Gihulagway sa mga nakasaksi nga naugbok ang ulo sa mga biktima sa karsada ug ang bagolbagol ni Magnitiko diha-diha nabuslot ug mibusagak ang dugo niini nga maoy hinungdan sa hinanali niyang kamatayon.

Samtang ang angkas niini nga igo lang nakuyapan pulos nabali ang duha uban sa dagkong samad sa iyang dagway gumikan sa pagkabagnos sa sementadong karsada.

Gihatod dayon kini ngadto sa Barili District Hospital apan gumikan sa kagrabi, gibalhin kini sa tambalanan sa dakbayan sa Sugbo nga walay panimuot.

Ang kapolisan milusad karon og imbistigasyon kun tinuod ba ang mga taho nga nagpadayon ang motor racing sa maong lugar. (FREEMAN)