CEBU, Philippines - Nagplanong mangayo og tabang sa buhatan sa National Bureau of Investigation (NBI) ang manag-uyab nga sila Sven Erik Berger ug Karen Castro Esdrelon kinsa gitumbok nga suspetsado sa pagdagit ug pagpatay ni Ellah Joy Pique niadtong Pebrero 9 ning tuiga.
Matud pa ni Karen nga modangop gayud sila sa NBI aron masulbad dayon ang maong kaso ug mapamatud-an nga nasaypan lang sila.
Midugang si Karen nga kun mohimo na og imbestigasyon ang NBI nanghinaot sila nga unta mogawas gayud ang kamatuoran nga sila nasaypan lang.
Samtang mipadayag usab si Esdrelon nga maningkamot lang sila nga makagawas gikan sa kustodiya sa kapolisan apan wala pa usab sila masayod kun unsay lakang ang ilang pagabuhaton.
Mipasabot usab si Esdrelon nga kun ugaling mapamatud-an nga sila nasaypan lang posibleng dili na usab sila mopasaka og kaso batok sa kapolisan, tungod kay ilang napanglantawan nga mag-usik lang sila og kuwarta ug panahon, ug gawas niini, dili na usab mahibalik ang naguba nilang dungog ug kridibilidad.
Samtang mibutyag usab si Esdrelon nga mao ra og nadismaya na ang iyang hinigugma nga si Berger sa nahitabo kanila ug gani gusto na kaayo kining mobalik sa ilang nasud uban siya aron didto na mamuyo imbis anhi unta sa Pilipinas.
Nasayran nga sa miaging adlaw gipasaka na sa kapolisan ang kasong Kidnapping with Homicide batok sa duruha. (BANAT NEWS)