Biñas gikiha kay nanghinol

CEBU, Philippines - Tungod sa giingong pagpanghinol sa dughan sa usa ka reporter, si Supt. Henry Biñas, hepe sa Talisay City Police Station (TCPS) nagyaka karon sa pinabokal nga tubig.

Kini sa dihang gikiha siya ngadto sa korte ug sa Police Regional Office (PRO)-7 sa reporter nga giingong iyang gibinastosan.

Si Carmel Loise Matus, hingkod ang panuigon, dalaga ug correspondent sa Cebu Daily News (CDN) maoy misang-at sa maong kaso batok kang Biñas niadtong Martes.

Si Matus sa iyang affidavit nagkanayon nga niadtong Pebrero 8, 2011 mga alas 9:00 ang takna sa kabuntagon miadto siya sa buhatan ni Biñas aron sa pagpangapkap og balita ilabi na sa kaso ni Joavan Fernandez, ang sinagop nga anak ni Mayor Socrates Fernandez.

Matud pa ni Matus nga kauban niya sa maong higayon si Robert Sabiquil, reporter sa Bombo Radyo dihang sa dayon nilang gawas sa opisina ni Biñas gibunlot sa hepe ang iyang bukton aron modikit sa lawas niini dayong hinol sa iyang dughan ug misuway kini og hawok kaniya.

Midugang si Matus nga niadtong higayona mikisikisi siya aron makaikyas sa lig-on kaayong mga kamot ni Biñas ug gumikan sa kakurat nawad-an siya og umoy sa pagpadayon pa sa pagpangita og balita niadtong tungora.

Sa iyang kasagmuyo nakahukom siya sa pagsang-at og kiha batok sa opisyal sa kapolisan sa Talisay. 

Gawas sa maong kaso ang CDN miduso usab og reklamong administratiba batok kang Biñas ngadto sa buhatan ni Chief Superintendent Ager Ontog, Regional Director sa PRO-7.

Si Biñas sa iyang habig mibutyag sa Banat News kagahapon nga wala pa siya makadawat og kopya sa maong reklamo batok kaniya.

Matud niya nga wala siya’y dautang motibo, wala siya’y gitagoan ug andam niyang tubagon ug atubangon ang nahisgutang reklamo batok kaniya.

Si Biñas milingkod isip hepe sa TCPS niadtong Nobiyembre 2008 hulip kang Superintendent Romeo Perigo.

Sa maong gidugayon niya sa pagkahepe sa Talisay, ubay-ubay na usab ang kasong iyang nasulbad, diin duha niini mao ang bahin sa kamatayon ni Padre Jovencio Rabusa ug kanhi Provincial State Prosecutor Hernando Masangkay.

Si Biñas mipatuman usab sa balaod batok kang Joavan panahon sa pagpabadlong sa nahisgutang sinagop sa mayor. (BANAT NEWS)