Koreano gikulata ug gidunggab sa dispatser

CEBU, Philippines - Usa ka Koreano naangol human kini kulataha ug dunggaba sa tulo ka wala hiilhing dispatser didto sa barangay Pajo, dakbayan sa Lapulapu sa miaging gabii.

Ang biktima mao si Cha In Sung, 40 anyos.

Matud pa ni PO3 Manolito Abellanosa sa homicide section sa kapolisan sa maong dakbayan nga gikan pa nga mi-check-in sa Queensland Motel ang biktima ug nanugo kini sa mga dispatser sa pagpangita og taxi nga iyang kasakyan.

Unya matud pa ni Abellanosa nga pipila ka gutlo ang nakalabay miabot ang taxi.

Apan dihang gipangayoan sa mga dispatser og bayad sa ilang pagtawag og taxi, giingong nagdumili ang Koreano sa paghatag og kuwarta.

Busa dihadiha ila kining gibunlot gikan sa taxi ug gikulata, dayon gihansakan sa kutsilyo ang tiyan sa biktima.

Ang biktima daling gihatod ngadto sa Mactan Doctors Hospital samtang ang mga kriminal daling misibat. - BANAT NEWS