Suspek sa kidnap-slay gikiha

CEBU, Philippines - Pormal nang gipasakaan og kaso sa kapulisan sa probinsya kagahapon sa hapon ang Norwegian national ug uyab niining Filipina may labot sa pagdagit ug pagpatay sa 6-anyos nga si Ellah Joy Pique niadtong miaging semana.

Si Sr. Supt. Erson Digal, hepe sa kapulisan sa probinsya mitug-an nga kasong Special Complex Crime of Kidnapping with Homicide ang ilang gisang-at nga kaso batok nila ni Sven Erik Berger ug Karen Castro Esdrelon.

Si Digal nagkanayon nga lig-on kaayo ang kaso nga ilang gipasaka batok sa mga suspek sanglit duna silay mga ebidensya ug tulo ka saksi nga miila ug mitumbok sa duha.

Samtang kagahapon napakyas ang kapulisan nga ablihan ang laptop ni Esdrelon human nagdumili ang naulahi nga paablihan kini sa kapulisan.

Apan si Esdrelon nagkanayon nga dili tinuod ang alegasyon ni Digal sa interbyu niini sa mga sibyaanan nga wala siya mokooperar o nagdumili nga paablihan ang iyang laptop kundili wala mangayo kaniya ang kapulisan sa password sa iyang laptop.

Hinuon si Digal mipadayag nga dili nalang sila maghasol kang Esdrelon nga ablihan ang laptop niini tungod kay lakip man kini sa ilang ebidensya ug adto nalang sila mohangyo sa korte aron maablihan ang laptop.

Malaumon si Digal nga kung maablihan ang laptop ni Esdrelon posibling duna pa silay makuhang laing ebidensya may labot sa pagdagit ug pagpatay sa 6-anyos nga batang si Pique.

Samtang sa pikas bahin, gibutyag ni Digal nga desidido gyud nga mopasaka og laing kaso batok ni Esdrelon ang inahan sa laing 7-anyos nga batang babaye nga gisuwayan sa pagdagit niadtong Enero 9 sa miaging buwan diha sa duol sa simbahan sa barangay Jagobiao sa dakbayan sa Mandaue.

Matud pang Digal nga gikuhaan na og affidavit sa kapulisan sa Mandaue ang inahan ug anak may labot sa maong hitabo.   

Matud pang Digal duna siyay gipa-police line-up nga duha ka policewoman ug ikatulo si Esdrelon.

Matud pa niini nga positibong giila ug gitudlo si Esdrelon sa inahan ug sa bata tungod kay mitug-an ang inahan nga nagbinunlutay pa sila sa bata niadtong higayona.

Posibleng kasong attempted kidnapping ang ipasaka usab sa kapulisan batok ni Esdrelon bahin aning kasoha.  - BANAT NEWS