Driver nadasmagan angol

CEBU, Philippines - Nalandig sa tambalanan ang usa ka drayber sa traysikad human kini madasmagi og usa ka motorsiklo sa may merkado publiko sa lungsod sa Cordova kagahapon sa kaadlawon.

Ang biktima mao si Ramel Amancia, 21, nga taga barangay Mahayahay, lungsod sa Cordova samtang ang suspetsado mao si Racel Anlocotan, 20, taga barangay Cogon sa maong lungsod.

Nasayran nga kusog kaayo nga nagpadagan ang suspetsado sa iyang motorsiklo samtang nakainom og ilimnong makahubog gumikan kay gikang nagsaulog sa adlaw sa kasingkasing.

Maoy hinungdan nga pag-kurbada sa usa ka likoong bahin sa karsada wala na kini makabawi apan mideretso og dusmog ngadto sa biktima nga nag-estambay ug naglingkod sa iyang sikad-sikad.

Pulos nasugamak sa mga samad ug bali sa lawas ang biktima ug ang suspetsado ug gihatod dayon sila ngadto sa   Vicente Sotto Memorial Medical Center (VSMMC) sa dakbayan sa Sugbo. - Reina Vita Labang, ug Maria Ana Carmela Estenor (BANAT NEWS)