Sitoy mihangop sa tabang ni Garcia

CEBU, Philippines - Gihangop ni Mayor Adelino Sitoy sa lungsod sa Cordova ang gipatuman sa kagamhanan sa lalawigan nga pagbantay sa kadagatan sa mga kalungsoran ug dakbayan.

Si Sitoy sa iyang pagtambong sa miting sa Metro Cebu Development Council (MCDC) nga gipatawag ni Gobernador Gwendolyn Garcia miingon nga dako og ikatabang ang pag-umol sa anti ilegal fishing task force sa lalawigan .

Matud pa niya nga ang ilang lungsod sa Cordova nga nagbaton og 400 ka ektarya nga hunasan gibantayan nila pag-ayo sanglit kanunay kining gibisitahan sa mga mananagat nga may illegal nga panagat.

Gitataw ni Sitoy nga makaayo kanilang taga Cordova ang pagpanginlabot sa kagamhanan sa lalawigan sa pagbantay sa kadagatan sanglit makatabang kini kanilang taga Cordova.

Si Gobernador Garcia kinsa maoy miumol sa anti illegal fishing task force hugot nga mimando sa pagdakop sa tanang illegal nga panagat sa tibuok lalawigan.

Miresulta usab kini sa pagkasikop sa pipila ka mga mananagat nga nagpasiugda og illegal nga panagat ug nasakmit ang mga nakuha nilang isda. 

Kahinumdoman nga usa sa mga marine watch sa maong lungsod nga si Rodrigo Sultan gipatay sa duha ka mananagat nga taga dakbayan sa Talisay sa kadagatan sa Cordova sa miaging buwan. Nagpabiling nagtingkagol karon sa prisohan   ang mga suspetsado. - BANAT NEWS