1 patay, 2 angol sa disgrasya sa motor

CEBU, Philippines - Patay ang 61 anyos nga lola ug angol ang 71 anyos niyang bana dihang nadasmagan sa ilang motorsiklo ang 5 anyos nga batang lalaki didto sa highway sa barangay Nangka lungsod sa Balamban niadtong Lunes sa alas 12:00 sa udto.

Ang namatay diha-diha mao ang angkas sa motorsiklo nga si Adelaida Susosco Bayotas, 61, samtang ang mga angol mao iyang bana nga si Alfredo Pasaylo Bayotas, 71, ug si Joshua Cupas Artajo, 5 anyos, ang tanan pulos taga barangay San Roque, lungsod sa Asturias.

Si PO2 Vinchie Ramonido Acaso, traffic investigator sa Balamban Police mibutyag sa Banat News nga ang traysikol nga gisakyan sa magtiayon nagpaingon na untang mopauli sa ilang lungsod dihang pag-abot nila sa maong lugar may traysikol nga kalit nga mihunong.

Unya ang 5 anyos nga si Artajo daling nanaug gikan sa maong traysikol dayong labang sa karsada ug gumikan kay wala makabantay si Bayotas nga nagpadagan sa iyang motorsiklo nadasmagan ang bata.

Busa mibalitok ang motorsiklo ug maayo nalang si Bayotas nga nagdala sa motor kay may helmet busa nasalbar ang iyang kinabuhi, apan ang iyang asawa nga walay helmet maoy naintimano kay nabunal ang ulo niini sa karsada.

Si Artajo gidala dayon ngadto sa Balamban District Hospital, samtang si Bayotas nga nahiagom lang sa gagmay’ng pangos gibalhog sa prisohan sa kapolisan.  - BANAT NEWS