'For better and for worst, until death do us part'-Esdrelon ug Berger

CEBU, Philippines - “For better and for worst, until death do us part,” mao kini ang panaad sa usa’g-usa sa gikostudiya nga registered nurse nga Pilipina ug computer engineer nga langyaw nga gipasanginlan nga maoy midagit ug mipatay sa 6-anyos nga si Ellah Joy Pique.

Karung adlawa mao unta ang gikatakdang adlaw aron pormal nang pangayuon ni Sven Erik Berger ang kamot ni Karen Castro Esdrelon aron magminyo nga plano unta ni Berger iyang buhaton sa usa ka mahalong hotel sa Hongkong.

Apan tungod sa pagdakop kanila, kalit nga nahanaw ang ilang plano. Matud pa ni Esdrelon nga sa wala pa ang ilang flight padulong unta sa Hongkong dili niya mahulagway ang kalipay nga iyang gibati nga unta karung adlawa mamahimo na siyang pormal nga fiancee ni Berger.

Gani aduna na siya’y gipalit nga pulang sinina ug sandals nga suoton atol sa formal engagement unta nila ni Berger sa Hongkong.

Mibutyag usab si Esdrelon nga ang nahitabo kanila usa lang ka pagsulay sa ilang panaghinigugmaay ug nakapalig-on hinuon sa ilang bug-at nga pagbati.

“It makes our relationship getting stronger and it bind us together more and more,” pasabot pa ni Esdrelon.

Samtang si Berger sa iyang bahin miingon nga iyang nakahimamat si Esdrelon sa usa ka site sa internet niadtong Agusto 19, 2010 ug nahimo silang chat mates ug nagkasabot nga magkita niadtong Oktubre 27, 2010 pinaagi sa pagbiyahe nganhi.

Matud pa ni Berger nga bisan paman sa hamubo nga panahong sila nagkauban ni Esdrelon iya dayon kining nauyonan.

“I really enjoyed the time that we spend together and also with her family, and by that time I planned to go back again,” pasabot pa ni Berger.

Gani unang higayon nga nagka-bonding ang duruha sa Boracay diin didto sila nagkasinati sa ilang mga batasan sa usa’g-usa.

Niadtong Pebrero 7, nakadesider si Berger nga mobalik sa Sugbo aron pangayuon ang kamot ni Esdrelon sa kaminyoon apan iyaha kining dad-on sa Hongkong aron kini surpresahon.

Malaumon si Esdrelon nga kun mahuman lang ang tanan nilang giatubang nga pagsuway karon ilahang ipadayon ang naungot nga engagement ug hayan sila magpakasal karong bulan sa Nobiyembre.

“Kun mahuman lang ni tanan, basta naa lang mi oras amo jud ning tumanon among engagement date. Continue gihapon among plan for the wedding maybe this November or next year siguro,” pasabot pa ni Esdrelon.

Si Esdrelon adunay anak nga lalaki nga nagpangidaron og 2-anyos samtang si Berger aduna usab duha ka anak nga nagpangedaron og 16-anyos ug 20-anyos nga naa pa gihapon sa iyang kostudiya. Bb