CEBU, Philippines - Pormal nga miduso og petisyon ang kahugpungan sa mga mamumuo dinhi sa Sugbo nga nangayo og dugang usbaw sa suholan taliwala niining padayung nagsaka nga presyo sa mga nag-unang palaliton ug pagpatuman sa umento sa mga pletihan sa jeepney ug taxi.
Ang Alliance of Progressive Labor (APL) inabagan sa mga kaalyado niining independent labor unions maoy nangulo pagduso sa petisyon sa buhatan sa Regional Tripartite Wages and Productivity Board (RTWPB-7) kagahapong adlawa atol sa Valentines Day.
Gipadayag ni Boboy Belarmino sa Cebu Labor Coalition nga panahon na aron usbawan ang suholan alang sa mga mamumuo dinhi sa Sugbo gumikan kay dili na paigo pagtubag sa inadlaw-adlaw nga panginahanglan ang gipatuman karung P285 nga minimum nga suholan tungod ning pagmahal sa mga palaliton.
Gibasehan usab nila ang gipatumang dugang usbaw sa pletihan sa jeepney ug taxi nga nakapasamot sa kalisod sa mga mamumuo tungod kay mosamot nga dili na paigo ang ilang kinitaan.
Subay sa giduso nga petisyon gi-awhag nila ang RTWPB-7 nga ipatuman ang dugang P120.40 nga usbaw sa suholan matag adlaw gikan sa minimum nga suholan pagkakarun.
Gipasabot ni Belarmino nga pila na ka higayon nga nangayo sila og umento apan ang labing usbaw nga gipatuman mao lang ang P18 niadtong milabay’ng tuig nga gidawat lang nila bisan og gamay ra kaayo tungod kay misabot sila sa nasinati kaniadto nga global financial crisis sa nasud ug ubang bahin sa kalibutan.
Giatol nila ang pagduso sa petisyon sa kasaulogan sa Valentines Day aron malukmay ug mahumok ang kasingkasing sa mga hingtungdang opisyal sa gobiyerno ug aprubahan niini ang gipangayo sa petisyon.