Tanod nakadawat og batuta

CEBU, Philippines - Ang mga barangay tanod sa dakbayan sa Mandaue nakadawat usab sa mga kahimanan gikan ni Gobernador Gwendolyn Garcia nga iyang giapod-apod sa kabarangayan sa tibuok lalawigan.

Ang maong mga kahimanan naglakip sa belt bag, flashlight, whistle ug batuta, gihatag ngadto sa 20 ka barangay tanod sa 27 usab ka barangay sa maong dakbayan.

Gipaagi kini sa buhatan ni Association of Barangay Council (ABC) federation president nga si Ernie Manatad kinsa mao usab ang mitugyan niini ngadto sa mga kauban niyang barangay kapitan.

Ang pag-apod-apod sa maong mga kahimanan gisaksihan usab sa tanang barangay kapitan ug mga barangay konsehal nga naglakip sa ilang chairman sa committee on peace and order.

Si Mayor Jonas Cortes sa iyang pamahayag atol sa pagtunol sa maong mga kahimanan mipasabot sa kamahinungdanon sa kaakohan sa mga barangay tanod sanglit mao man kini ang magsilbing kaabag sa kapolisan sa pagpatuman sa kahapsay ug kalinaw.

Dugang pa ni Cortes nga ang pagpakigsandurot sa mga polis ug sa mga barangay tanod maoy labing mahinungdanon aron sa pagpakgang sa kriminalidad nga mahitabo sa kabarangayan.

Si Senior Superintendent Noel Gillamac kinsa direktor sa Mandaue City Police Office (MCPO) mipadayag usab sa iyang kahinangop sa maayong tinguha sa mayor sa dakbayan.

Matud pa ni Gillamac nga sukad masinati ang hugtanong suporta sa kumunidad ngadto sa kapolisan, ilang nasuta nga mikunhod usab ang krimen sa dakbayan nga nagtala og 3,133 sa tuig 2009 ngadto na lamang sa 1,700 sa tuig 2010.   - (BANAT NEWS)