Lalaking midasmag sa iro namatay

CEBU, Philippines -  Misampak ang ulo sa 29-anyos nga lalaki sa punoan sa Narra dihang nawad-an og control sa iyang gimanehong motorsiklo dihang nadasmagan niini ang usa ka iro diha sa sitio Hardin barangay Ilihan siyudad sa Toledo niadtong Domingo sa alas 4:30 sa hapon.

Ang biktima mao si Elmer Samusa Buctot, 29, lumad nga taga Tres de Abril Labangon syudad sa Sugbo apan temporaryong nagpuyo sa barangay Canlumampao.

Matud ni SPO3 Allan Barquin, traffic investigator sa Toledo City Police dihang nahinabi sa Banat News ang biktima sakay sa iyang motorsiklo dunay plaka nga NR-8927-YA gikan sa barangay Sangi paingon nang mopauli sa barangay Canlumampao.

Apan pag-abot sa maong lugar usa ka iro ang milabang sa dalan ug tungod kay alanganin na paghunong tungod kay kusog pud ang dagan niini naligsan niini ang maong mananap apan mao kini nakaingon nga nawad-an siya og kontrol sa motor ug didto mosampak sa puno-an sa Narra sa daplin sa dalan.

Tungod kay wala magsul-ob og helmet maayong pagkapilit sa ulo niini sa puno-an sa maong kahoy ug wala nay panimuot nga gihatud sa Toledo City District Hospital apan gideklarar nga dead on arrival.   - (BANAT NEWS)