Drayber gipusil angol

CEBU, Philippines - Samaron ang usa ka drayber sa taxi human kini pusila sa wala hiilhing tawo sa compound sa iyang gipuy-ang balay sa Base 4, Saint Jude Bulacao, sa barangay Bulacao siyudad sa Sugbo kagahapon sa alas 9:40 sa buntag.

Ang biktima giila sa kapolisan nga si Roque Bulagao, 39, minyo, kasamtangan nagpuyo sa nahisgutang lugar ug drayber sa K-Factor Taxi.

Si PO3 Witzel Berry sa Homicide Section sa kapolisan sa dakbayan sa Sugbo nagkanayon nga gikan pang migrahe sa iyang taxi ang biktima dihang pag-abot niya sa compound sa iyang gipuy-an may tawong nag-atang ug gipusil siya makaduha ka higayon.

Human mahagba sa yuta ang biktima, misibat usab dayon ang kriminal ug misakay sa nagpaabot nga motorsiklo, samtang ang biktima kinsa samdan sa kilid, gihatod dayon ngadto sa Cebu City Medical Center.

Ang kapolisan nga misusi sa nahitaboan nakapunit og duha ka kabhang sa bala sa .45 kalibreng pistola.   - (BANAT NEWS)