CEBU, Philippines - Giandam na karon sa kagamhanan sa dakbayan sa Sugbo ang temporaryong pinuy-anan alang sa mga maapektohan sa nagpadayon nga demolisyon sa dapit sa kasapaan sa dakbayan sa Sugbo.
Sumala ni Konsehal Roberto "Bob" Cabarrubias nga gitagalan lang og usa ka buwan sa pag-estar sa maong puloy-anan ang mga apektadong pamilya samtang mangandam sila sa ilang dad-onon sa ilang pagpamauli ngadto sa probinsiya.
Ang temporaryong pinuy-anan nila karon gipahimutang sa Block 27 sa Barangay Mabolo nga gilangkoban sa 50 ka container van ug 1,000 kapin ka mga tawo ang masulod niini.
Giingong puwede na kining mapuy-an sulod niining semanaha apan mag-agi gyud sa Department of Social Welfare and Services (DSWS) ang mga tawo nga buot moestar niini aron masiguro kauban sila sa naapektohan sa demolisyon.
Dugang pa ni Cabarrubias nga libre sa kuryente ug tubig ang maong pinuy-anan ug ang konsepto niini gikuha sa Devotee City panahon sa Sinulog.
Padayon karon ang demolisyon sa nagkadaiyang illegal nga estraktura sa Barangay Mabolo, Kasambagan ug uban pa.
Mokabat sa 30 ka mga sakop ang demolition team sa siyudad nga gipangulohan ni Noel Artes sa Squatters Prevention and Encroachment Elimination Division (SPEED) ang nangguba sa mga kabalayan.
Samtang 30 na ka mga balay ang naguba sa SPEED ug ang ubang naapektohan mipauli na sa probinsya ug ang uban nangabang og balay. - (BANAT NEWS)